Hewlêr (Rûdaw) - Pirtûka "Çima Neteweperwerî?" ya Yael Tamirê bi wergera Fahriye Adsayê ji Weşanên Avestayê derket.
Pirtûk amaje bi wê yekê dike ku neteweperwerî parçeyeke esasî ya modernîte û bipêşveçûnê ye û bi rêya koalîsyoneke nav-çînî derfetên biqîmet pêşkêşî welatiyan kiriye.
Di nivîsa danasîna pirtûkê de tê gotin ku neteweperwerî bi girêdana xwe ya erdnîgarî, di navbera netewe û dewletê de têkiliyekê ava dike û li ser herêmeke diyar doza otorîteyeke rewa dike.
Pirtûk diparêze ku neteweperwerî tenê bersivê nade pêdiviyên dewletê her wiha daxwaza takekesên modern a xwedîderketina li jiyana xwe jî pêk tîne û tecrubeyên şexsî û giştî dewlemend dike.
Li gorî pirtûkê, neteweperwerî ji bo meseleyên sînoran, pênaseya "gel" û belavkirina derfetan sedemên maqûl peyda dike û welatiyên xwe teşwîq dike ku ji bo qenciya hevpar bi hev re bixebitin.
Di danasîna pirtûkê de wiha tê gotin:
"Bi halê xwe yê herî xirab, hêzeke wêranker û hilweşîner e, bi halê xwe yê herî baş, yek ji hêzên herî zêde avaker û afirîner e.
Divê em hewl bidin û ji tecrubeyên neteweyî sûdê wergirin lê çavê xwe ji rîskên wê re jî negirin."
Pirtûka "Çima Neteweperwerî?" ji aliyê Fahriye Adsayê ve ji Îngilîzî hatiye wergerandin û 208 rûpel in.
Yael Tamir kî ye?
Yael "Yuli" Tamir, akademîsyen û siyasetmedareke berê ya Îsraîlî ye ku 26ê Sibata 1954an ji dayîk bûye.
Tamir, di navbera salên 2003 û 2010an de wekî endama Partiya Karkeran di Parlamentoya Îsraîlê (Knesset) de cih girt û wezîfeyên wekî Wezîra Koçberan, Wezîra Perwerdeyê û Cîgira Serokatiya Knessetê bi rê ve birin.
Piştî siyasetê, wê di navbera salên 2010 û 2020an de Serokatiya Koleja Endezyarî û Dîzaynê ya Shenkarê kir û ji Çiriya Pêşîn a 2020an vir ve jî Seroka Koleja Beit Berlê ye.
Her wiha, ew ji sala 2015an vir ve li Dibistana Hikumetê ya Blavatnik a Zanîngeha Oxfordê wekî profesor dersan dide.
Fahriye Adsay kî ye?
Fahriye Adsay sala 1971ê li navçeya Dêrikê ya Mêrdînê ji dayîk bûye.
Wê dibistana seretayî, navîn û lîse li bajarê Îzmîrê yê Tirkiyeyê xwendiye.
Lîsansa xwe li Zanîngeha Rojhilata Navîn a Teknîkî ya Enqereyê di beşa dîrokê de qedandiye.
Wê her wiha li Zanîngeha Dîcleyê ya Amedê di beşa civaknasiyê û li Zanîngeha Artukluyê ya Mêrdînê jî di beşa Ziman û Wêjeya Kurdî de master kiriye.
Adsayê ji Îngilîzî ji bo Tirkî û Kurdî gelek pirtûk wergerandine.
Ji sala 2014an vir ve xwedî û edîtora kovara Zaremayê ye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse