Hewlêr (Rûdaw) - Wekîlê Serokê Koma DEM Partiyê Sezaî Temellî nerazîbûn nîşan da sekinandina 25 barhilgirên ku alîkariya mirovî dibin Kobaniyê got, "Divê Tirkiye bi cidiyet û berpirsyariya dewletekê tevbigere."
25 barhilgirên ku ji aliyê Platforma Piştgirî û Parastin Bajar a Amedê ve kelûpelên alîkariya mirovî ji bo Kobaniyê bar kirine, ev 3 roj in li navçeya Sirûçê ya Rihayê li tesîseke bêhnvedanê tên sekinandin.
Heta niha destûr nehatiye dayîn ku barhilgir derbas bibin.
Pêkhateyên platforma alîkariyê, rayedarên DEM Partiyê û nûnerên rêxistinên civaka sivîl li ser xeta sînor li benda destûrdanê ne.
"Divê ev derî were vekirin"
Wekîlê Serokê Koma DEM Partiyê Sezaî Temellî serdana deverê kir û bang kir ku deriyê sînor demildest were vekirin.
Temellî diyar kir ku ew tenê 10 kîlometreyan dûrî Deriyê Sînor ê Mursîtpinarê ne û tekez kir ku divê alîkarî demildest bigihin cihê xwe.
Temellî got, "Di van barhilgiran de av, mamaya zarokan, şîr, pêçekên zarokan û kelûpelên sereke hene.
Em 10 kîlometreyan dûrî sînor in lê derî hîn girtî ne.
Divê ev derî demildest were vekirin; divê ev kelûpel demildest bigihin wan zarok û mirovan ku li Kobaniyê li dijî birçîbûn û sermayê têdikoşin."
"Dema mijar dibe Kurd tên sekinandin"
Temellî astengkirina alîkariyên mirovî wekî nayê qebûlkirin pênase kir û wiha axivî:
"Divê Tirkiye bi cidiyeta dewletekê tevbigere.
Ew kesên ku dema alîkarî dişînin deverên cuda yên cîhanê sibê û êvarê di televizyonan de behsa wê dikin.
Mixabin dema mijar dibe Kobanî, Rojava û Kurd 25 barhilgiran bi rojan didin sekinandin.
Ne tenê ev wesayît, gelek kelûpelên din jî di embaran de ne. Divê ev rê demildest were vekirin, alîkarî bigihin bira û xizmên me yên li wir."
Di nava alîkariyên ku ji bo Kobaniyê hatine komkirin de xwirek, cilûberg û kelûpelên jiyanî hene.
Rayedaran hîn daxuyaniyeke fermî nedaye ka çima destûr nayê dayîn ku barhilgir derbas bibin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse