Sîma Abxizir û Sidki Zîlan\ Wêne û Vîdeo: Rûdaw
Hewlêr (Rûdaw) - Endamê Platforma Neteweyî ya Kurdan û hiqûqnas Sidki Zîlan, di bultena Rûdawê de behsa armanc û xebatên platforma nû kir û ragihand ku armanca wan a sereke avakirina yekîtiya Kurdên Bakurê Kurdistanê ye.
Zîlan teqez kir ku ew dixwazin bi rêyên yasayî, şefaf û dûrî tundiyê doza mafên neteweyî yên Kurdan bikin.
Sidki Zîlan di bersiva pirsên Rûdawê de hûrgiliyên xebata xwe û nexşerêya platformê eşkere kirin.
“Pêdivî bi aqilekî hevbeş û yekîtiyê heye”
Sidki Zîlan diyar kir ku avakirina vê platformê ne luks e, lê pêdiviyek e û got:
“Di nava 10 salên dawî de li Başûr, Rojava û Bakurê Kurdistanê gelek bûyer qewimîn.
Gelê me agahdar e. Di dîrokê de, wekî mînaka sala 2005an bi navê ‘Tev-Kurd’ hewldanek hebû lê piştî 7-8 salan negihişt armanca xwe.
Niha em dixwazin bi aqilekî hevbeş û fikreke azad, yekîtiya Kurdên Bakur û yên li metropolên Tirkiyeyê ava bikin.”
Zîlan destnîşan kir ku armanca wan a sereke ew e ku hemû pêkhateyên li Bakurê Kurdistanê (Kurd, Ereb, Tirkmen, Suryanî) hembêz bikin lê divê aktorê sereke Kurd bin û got, “Heger Kurd pêşengiyê nekin, mafê kêminan jî nayê parastin. Armanca me dadmendî, azadî û wekhevî ye.”
“Nexşerê dê di kongreyê de were diyarkirin”
Parêzer Zîlan derbarê nexşerê û daxwazên platformê de diyar kir ku ew wekî destpêker biryara dawî nadin lê dê di civîn û kongreya ku bê lidarxistin de biryar bê dayîn.
Zîlan di berdewamiyê jî de got, “Em dê bang li rûspî, siyasetmedar, partî û saziyan bikin.
Kesên hazir dê nexşerêyê diyar bikin. Dê daxwazên me ji Enqereyê û ji bo gelê me zelal bibin.
Cîhan eleqedarê meseleya Kurdistanê ye lê divê em pêşî li ser lingên xwe bisekinin û yekîtiya xwe ava bikin, paşê em dikarin daxwaza alîkariyê ji kesên adil û parêzvanên mafên mirovan bikin.”
“Em mafên neteweyî yên wekî yên Ereb û Tirkan dixwazin”
Li ser pirsa “Gelo daxwaza we tenê mafên çandî ne yan mafên siyasî yên neteweyî ne?”, Sidki Zîlan bersiveke zelal da û got:
“Kurd milet in. Li gorî hiqûqa navdewletî mafê her miletekî çi be, yê me jî ew e.
Em nikarin sînoran daynin. Ereb, Tirk û miletên din xwedî çi mafî bin, Kurd jî xwedî heman mafî ne (Dîrok, ziman, ax). Em dê li gorî derfetan û îradeya gelê xwe nexşerêya xwe diyar bikin.”
“Rêya tundiyê girtî ye, em dê yasayî û şefaf bixebitin”
Zîlan bal kişand ser şêwaza xebata xwe û bi eşkereyî rêya tundiyê red kir û got:
“Rêya tundiyê li pêşiya me girtî ye. Em dê bi awayekî yasayî û şefaf bixebitin.
Kurdên Bakur û yên li metropolan, ji 50 sal in ji ber tundiyê aciz bûne.
Tundî xizmeta doza Kurdistanê nekiriye. Em li derveyî vê mijarê ne. Bêyî ked û yekîtiyê, em nikarin bigihîjin azadiyê.”
Helwesta li hemberî destûra nû û partiyên din
Zîlan derbarê destûra nû ya Tirkiyeyê de got: “Heger destûra nû hebûna Kurdan û mafên wan qebûl bike, em dê piştgiriyê bidinê.
Heger wekî destûrên 1924, 1961 û 1982yan me înkar bike, em pê re eleqedar nabin.”
Zîlan di dawiyê de, peyamek da partiyên heyî jî û got: “Pêdiviya hemû aliyan bi nîqaşê heye. Em ne li dijî ti partiyê ne.
Em dixwazin hemû hêzên Kurd, partî û sazî bi hev re li ser maseyê rûnin û bi aqilekî hevbeş tevbigerin.
Heger hinek bêjin em ne amade ne, aliyê ku amade ye divê bimeşe, ji ber ku ev meseleyeke neteweyî ye.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse