Hêvîdar Zana û Mehmet Kizmaz\ Wêne û Vîdeo: Rûdaw
Hewlêr (Rûdaw) - Malbata Rojwelat Kizmazê daxwaza lêkolîneke hûr û nû li ser dosyeya keça xwe û xwendekara zanîngehê Gulistan Dokuyê dike.
Birayê Rojwelatê Mehmet Kizmaz di bultena Rûdawê eşkere kir ku gumanên wan ên mezin li ser her du dozan hene û dewletê di dema xwe de erkên xwe bi cih neanîne.
"3 rojan li benda hewarê bû"
Mehmet Kizmaz diyar kir ku wan ji bo lêkolîneke nû serî li dozgeriyê daye.
Kizmaz bal kişand ser rapora otopsiyê û got, "Rasteqîniyek heye ku divê her kes bizanibe; xwişka min piştî windabûnê heta 3 rojan sax bûye.
Di raporê de hatiye tesbîtkirin ku jiyana wê heta nîvro û şeveqa roja sêyem neçûye.
Di wê pêşerojê de em bi her awayî li du wê geriyan û me bangî asayîşê kir lê kes nehat hewara wê.
Em dibêjin di wê dosyeyê de hinek kesî karê xwe bi rêk û pêk nekiriye."
Ji lêgerîna Gulistanê heta qedera heman
Kizmaz amaje bi têkiliya xwişka xwe û Gulistan Dokuyê kir û got:
"Ew hevalên gelekî nêzîkî hev bûn. Dema Gulistan winda bû, xwişka min bi şev û roj li du wê geriya da ku agahiyekê bi dest bixe.
Niha em dibînin ku şêwazê windabûna her duyan dişibe hev.
Navê parêzger û kurê wî di her du dozan de jî derbas dibin. Ev ne rasthatin e, ev nîşaneya pêwendiyeke kûr e."
"Mamosteyeke ku firaq dişûştin"
Mehmet Kizmaz bi dilêşî qala jiyana xwişka xwe ya li Dêrsimê kir û wiha domand:
"Ew mamoste bû lê ji ber ku nehatibû tayînkirin, li hoteleke Dêrsimê firaq dişûştin da ku debara xwe bike.
Ew keçeke xwendekar û xwedî vîn bû. Îhtimala ku wê bi daxwaza xwe dawî li jiyana xwe anîbe li cem me nîne.
Em bawer dikin ku ew tûşî zexteke derûnî û siyasî ya mezin bûye û ev rewş di dema dawî de zêdetir bûye."
Birayê Rojwelatê di dawiya axaftina xwe de destnîşan kir ku heta edalet pêk neyê ew dê ranewestin û daxwaz kir ku saziyên navneteweyî jî çavdêriya van dozan bikin.
Kizmaz di dawiyê de got ku malbat li dijî biryara "xwekuştinê" derdikeve û daxwaza lêkolîneke adil dike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse