Hewlêr (Rûdaw) - Sererkanê Îsraîlê Eyal Zamir diyar kir ku ew dê rê li ber bidestxistina şiyanên stratejîk ên Sûriyeyê bigirin, wê lawaz bikin û azadiya tevgera xwe ya li Sûriyeyê biparêzin.
Li gorî daxuyaniya artêşa Îsraîlê, Eyal Zamir piştî nêzîkî 2 salan cara yekem bi fermandarên payebilind ên artêşê re nirxandineke rewşê ya piralî kir.
Di civînê de, tabloya "îstixbarat, operasyon û stratejiyê" ya ji sînorên Îsraîlê heta hemû Rojhilata Navîn hat nirxandin û analîzên li ser wan hatin pêşkêşkirin.
Sererkanê Îsraîlê tekezî li ser wê yekê kir ku divê artêş ji bo êrişeke berfireh û giştî amade be û got:
"Em dê parastina serweriya xwe ya asmanî û bipêşxistina xebatên xwe yên îstixbaratê bidomînin."
Wî her wiha daxuyand ku ew dê rê li ber bidestxistina şiyanên stratejîk ên Sûriyeyê û Hizbulaha Libnanê bigirin, wan lawaz bikin û azadiya tevgera xwe ya li Sûriyeyê biparêzin.
“Şerê li Xezeyê yek ji şerên herî aloz e”
Zamir got, "Şerê li Xezeyê yek ji şerên herî aloz e ku artêşa Îsraîlê heta niha dîtiye" û anî zimên ku ew di şer de “berdêlên giran” didin.
"Şerê li hemberî Îranê hîn bi dawî nebûye"
Eyal Zamir li ser mijara Îranê jî rawestiya û got, "Îran û hevpeymanên wê hîn di hedefa me de ne. Şerê li hemberî Îranê hîn bi dawî nebûye."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse