Hewlêr (Rûdaw) - Şandeyên Amerîka û Ukraynayê doh li Berlînê civiyan û li ser "plana aştiyê ya ji 20 xalan" û ajandayên aborî gotûbêj kirin.
Li gorî daxuyaniya ku Nûnerê Taybet ê Amerîkayê Steve Witkoff li ser platforma Xê parve kir, civîna di navbera Serokê Ukraynayê Volodymyr Zelenskyy, Steve Witkoff, zavayê Serokê Amerîkayê Donald Trump Jared Kushner û şandeyên her du welatan de zêdetirî 5 demjimêran ajotiye.
Di daxuyaniyê de hat diyarkirin ku nûneran li ser plana aştiyê, ajandayên aborî û mijarên din "gotûbêjên kûr" kirine.
"Bipêşketineke baş çêbû"
Witkoff di daxuyaniya xwe de got, "Bipêşketineke baş çêbû û ew dê duşemê serê sibehê careke din bicivin."
Almanya mazûvaniya van şêwirînan dike ku beriya lûtkeyeke berfirehtir a îro pêk tên.
Di lûtkeya îro de tê payîn ku Zelenskyy, serkirdeyên Ewropayê û nûnerên Yekîtiya Ewropa û NATOyê werin cem hev.
Hîn jî ne diyar e bê ma berpirsên Amerîkayî dê beşdarî wê civîna lûtkeyê bibin yan na.
Zelenskyy doh gihişt Berlînê da ku ji bo agirbesteke gengaz û çarçoveya aştiyê ya bi Rûsyayê re gotûbêjên dijwar bike.
Serokê Ukraynayê beriya civînê ragihand ku Kîev niha li pey garantiyên ewlehiyê yên dualî yên hem bi Washingtonê re û hem jî bi welatên Ewropayî û welatên din ên wekî Kanada û Japonyayê re ye.
Pêvajo
Ev civîn xelekeke nû ya zincîra hevdîtinan e ku balê dikişînin ser çarçoveya aştiyê ji bo bidawîanîna şerê Rûsya û Ukraynayê.
Berê jî li Swîsre û Amerîkayê hevdîtin hatibûn kirin.
Meha çiriya paşîn, berpirs li Cenevreyê civiyabûn û pêşnûmeya "çarçoveya aştiyê ya safîkirî" amade kiribû ku nûjenkirina plana berê ya 28 xalî ya Amerîkayê bû.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse