Hewlêr (Rûdaw) - Raporeke nû ya "Global Firepower"ê welatên xwedî fîloyên herî mezin ên wesayîtên zirxî yên cîhanê eşkere kirin.
Amerîka bi ferqeke mezin di rêza yekem de ye û li pey wî welatî Hindistan û Çîn tên.
Di lîsteya 10 welatên herî mezin de Tirkiye, Îran û Yunanistan jî cih digirin.
Amerîka li lûtkeyê ye
Amerîkayê bi 391 hezar û 963 wesayîtên zirxî mohra xwe li lîsteyê xist.
Di envantera Amerîkayê de bi hezaran wesayîtên Stryker, Bradley û MRAPê û her wiha 4 hezar û 640 tankên sereke yên şer ên M1 Abrams hene.
Hindistan di rêza duyem de ye
Hindistan bi 148 hezar û 594 wesayîtên zirxî yên veguhastina personelan û 4 hezar û 201 tankan di rêza duyem de ye.
Bingeha fîloya Hindistanê ji tankên sereke yên şer ên wekî T-72 û T-90 ên Rûsyayê çêkirine pêk tê.
Ji bo piştgiriya mekanîze jî tankên xwemalî yên wekî Arjun û wesayîtên şer ên piyadeyan ên BMP-2 tên bikaranîn.
Çîn di rêza sêyem de ye
Çîn bi 44 hezar û 17 wesayîtên zirxî yên veguhastina personelan û 6 hezar û 800 tankan di rêza sêyem de ye.
Di fîloya Çînê de tankên sereke yên şer ên wekî Tip-96 û Tip-99 û her wiha wesayîtên zirxî yên veguhastina personelan ên ZBD-04 cih digirin.
Rûsya di rêza çarem de ye
Rûsya xwedî 137 hezar û 277 wesayîtên zirxî ye. Ji van 131 hezar û 527 wesayîtên zirxî yên veguhastina personelan e û 5 hezar û 750 jî tank in.
Di fîloya wî welatî de bi giranî modelên T-72, T-80 û T-90 li gel wesayîtên şer ên piyadeyan ên BMP-3 û wesayîtên zirxî yên veguhastina personelan ên modern ên BTRyê hene.
Fransa di rêza pêncem de ye
Fransaya ku di rêza pêncem de ye, xwedî 110 hezar û 932 wesayîtên zirxî yên veguhastina personelan û 215 tankan e.
Welat ji bo erkên xwe yên li Ewropa û derveyî welat tankên sereke yên şer ên Leclerc, wesayîtên şer ên piyadeyan ên VBCI û wesayîtên zirxî yên personelê yên VAB bi kar tîne.
Welatên din ên di lîsteyê de
Almanya: Bi 83 hezar û 556 wesayîtên zirxî di rêza şeşem de ye. Di envantera wî welatî de jî 296 tankên sereke yên şer ên Leopard 2 hene.
Îtalya: Bi 73 hezar û 480 wesayîtên zirxî yên veguhastina personelan û 200 tankên sereke yên şer ên Ariete di rêza heftem de ye.
Îran: Bi 65 hezar û 825 wesayîtên zirxî yên veguhastina personelan û hezar û 713 tankan di rêza heştem de ye. Piraniya tankên wê yên Sovyetê ne lê tankên xwemalî yên wekî Zulfîkar jî hene.
Tirkiye: Bi 61 hezar û 173 wesayîtên zirxî yên veguhastina personelan û 2 hezar û 238 tankan di rêza nehem de ye. Di envantera wê de tankên sereke yên şer ên Leopard 2A4 û M60 hene.
Yunanistan: Li Yunanistanê 61 hezar û 888 wesayîtên zirxî yên veguhastina personelan û hezar û 344 tank hene ku piraniya wan Leopard 2 û Leopard 1 in.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse