Hewlêr (Rûdaw) - Hevserokê Partiya Gelan a Wekhevî û Demokrasiyê (DEM Partî) Tuncer Bakirhan ji bo pêvajoya çareseriya li Tirkiye û Bakurê Kurdistanê li Londona paytexta Brîtanyayê ye.
Tuncer Bakirhan di civîn û gotûbêjên xwe yên derbarê pêvajoya çareseriya Pirsgirêka Kurdan de berdewam e û ji bo pêvajoyê daxwaza piştgiriya navneteweyî dike.
Hevserokê Partiya Gelan a Wekhevî û Demokrasiyê (DEM Partî) Tuncer Bakirhan ku di çarçoveya serdanekê de li bajarê Londonê dest bi hevdîtinên xwe kir.
Bakirhan di çarçoveya serdana xwe de ji bo “Pêvajoya Aştî û Civaka Demokratîk” hewl dide piştgiriyeke navneteweyî bi dest bixe.
Rawestgeha yekem a Bakirhan û şandeya pê re, saziya navdar a cîhanê Chatham House bû.
Bakirhan îro beşdarî civîneke taybet a maseya gilover bû û di civînê de ku gelek kesayetên girîng û siyasetmedar jî amade bûn.
Bakirhan derbarê “Pêvajoya Aştî û Civaka Demokratîk” de zanyariyên berfireh pêşkêş kirin.
Hevserokê DEM Partiyê her wiha derbarê şer û pevçûnên li Rojhilata Navîn nêrîn û pêşniyarên çareseriyê yên partiya xwe bi beşdaran re parve kir.
Bakirhan piştre beşdarî sempozyumeke li Civata Lordan bû ku tevahiya rojê berdewam kir.
Sempozyuma ku siyasetmedarê Kurd Osman Baydemîr û siyasetmedarên Brîtanî jî beşdar bûn, rastî eleqeyeke mezin a medyayê hat.
Bakirhan li wir jî derbarê pêvajoyê agahî dan û banga piştgiriya navneteweyî ji bo “Pêvajoya Aştî û Civaka Demokratîk” kir.
Hevserokê DEM Partiyê da zanîn ku statukoya 100 sal berê ya li herêmê hatiye avakirin bûye sedema kaos, şer û pevçûnan û da zanîn ku divê her kes bi nêrîn û felsefeyeke nû li çareseriya pirsgirêkan bigere.
Hat ragihandin ku Hevserokê Giştî Tuncer Bakirhan û şandeya pê re dê di rojên pêş de hevdîtinên xwe yên li Brîtanyayê bi saziyên cuda re bidomînin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse