میدیاکانی ئەڵمانیا بڵاویانکردەوە، رۆژنامەڤانێکی وڵاتەکەیان بە ناوی (ئیڤا ماریا میشێلمان) تەمەن 36 ساڵ، لە ناوچەکانی باکوور و رۆژهەڵاتی سووریا (رۆژئاوای کوردستان) بێسەروشوێن بووە. بەگوێرەی گوتەی بنەماڵەکەی، ئەو رۆژنامەڤانە لەلایەن سوپای سووریاوە دەستبەسەر کراوە.
وەزارەتی دەرەوەی ئەڵمانیا بە رووداوی راگەیاند، کارمەندانی کۆنسووڵخانەی گشتی وڵاتەکەی "بە شێوەیەکی کاتی" لە هەولێر گواستوونەتەوە. کارمەندانی باڵیۆزخانەی وڵاتەکەش لە بەغدا گوێزراونەتەوە.
وەزارەتى بەرگریى ئەڵمانیا دەڵێ، حکومەتی وڵاتەکەی هیچ پلانێکی بۆ زیادکردنی ژمارەی سەربازەکانی لە رۆژهەڵاتی نێوەڕاست نییە. ئەمە لە کاتێکدایە وەزیری بەرگریی وڵاتەکەش دەڵێ، بەشداری لە شەڕی ئیسرائیل و ئەمریکا لەگەڵ ئێران ناکەن.
حکومەتی ئەڵمانیا رایگەیاند، لە ماوەیەکی نزیکدا لە رێگەی فڕۆکەخانەکانی وەک مەسقەت لە عومان و ریاز لە سعودیە، هاووڵاتییانی خۆی لە وڵاتانی رۆژهەڵاتی نێوەڕاست دەگەڕێنێتەوە.
گوتەبێژێکی وەزارەتی ناوخۆی ئەڵمانیا بە رووداوی راگەیاند، یاسای کارکردن بۆ پەناخوازان دەگۆڕدرێت بۆ ئەوەی زووتر، واتە دوای 3 مانگ بتوانن کار بکەن. بەڵام جەختیشی کردەوە کە کارکردنی پەناخوازان "هیچ کاریگەرییەکی لەسەر بەڕێوەچوون یان ئەنجامی پرۆسەی پەناخوازی نابێت."
گەنجێکی تەمەن 27 ساڵی ئەفغانستانی لە شارۆچکەی ئاڵتێنبورگ-نۆرد لە هەرێمی تۆرینگنی ئەڵمانیا چووە نێو سوپەرمارکێتێک و لە 15 خولەکدا زیانێکی زۆری بە کەلوپەلەکان گەیاند. پۆلیس دەڵێت، "باری دەروونیی جێگیر نەبووە."
گوتەبێژێکی وەزارەتی دەرەوەی ئەڵمانیا دەڵێ، بەهۆی "زیادبوونی گرژییەکان" لەنێوان واشنتن و تاران، داوا لە هاووڵاتییانی وڵاتەکەی دەکات ئێران جێبهێڵن. ئەو گوتەبێژە هۆشداری دا کە لە کاتی تێکچوونی دۆخەکەدا هاووڵاتییان ناتوانن وەک پێویست هاوکاریی دیپلۆماسی وەربگرن.
داواکاری گشتیی بەرلین دەڵێ، هاووڵاتییەکی عێراقی تەمەن 38 ساڵ کە لەگەڵ چەند کەسێکی دیکە بە دزینی خشڵ و کاتژمێری گرانبەها بە بەهای 18 ملیۆن یۆرۆ تۆمەتبار دەکرێ، لە فڕۆکەخانەکەی پایتەختی ئەڵمانیا دەستگیرکراوە. بە گوتەی داواکاری گشتی، دیار نییە تۆمەتبارەکە عەرەبە یان کورد یان چ نەتەوەیەکی دیکە، بەڵام ئەوەیان ئاشکرا کردووە کە وڵاتینامەی ئەڵمانی نییە.
وەزارەتی گەشەپێدان و هاوکاریی ئابووریی ئەڵمانیا بە رووداوی راگەیاند، ئەڵمانیا لە ساڵی 2025دا، 53.25 ملیۆن یۆرۆی بۆ مەبەستی هاوکاریی مرۆیی بۆ عێراق دابین کردووە. سەبارەت بە پشکی ئاوەدانکردنەوەی شنگالیش، وەزارەتەکە گوتی کە ئەوان لەو ناوچەیەدا بە چەندین پڕۆژە "چالاکن".
وەزارەتی ناوخۆی ئەڵمانیا بە رووداوی راگەیاند، حکومەتی فیدراڵ بەهۆی کەمبوونەوەی ژمارەی کۆچبەران، لە کانوونی یەکەمی 2025ـەوە کۆرسەکانی فێربوونی زمانی کەمکردووەتەوە. دەشڵێت: ئامانجی ئەم بڕیارە نەهێشتنی هۆکارە هاندەرەکانە بۆ کۆچکردن بۆ ئەو وڵاتە.
