رووداو دیجیتاڵ
بەهای دینار لە بازاڕەکانی هەرێمی کوردستان زیاتر دابەزی. سەرۆکی ئەنجوومەنی بازاڕی ئاڵوگۆڕی دراو لە هەولێر و پسۆڕێکی دارایی دەڵێن: "ئاڵۆزییەکانی ڤەنزوێلا و ئەوەی لە نێوان ئەمریکا و ئێران روودەدات، هۆکارە".
هەفتەیەکە بەهای دیناری عێراقی بەرامبەر دۆلار دابەزیوە. دوێنێ 100 دۆلار گەیشتە 143 هەزار و 750 دینار، ئەمڕۆ بەرزتربووەوە و لە هەولێر 100 دۆلار بە 144 هەزار دینارە و لە سلێمانی بە 144 هەزار و 250 دینارە.
د. جەبار گۆران، پسپۆڕی کارگێڕی دارایی و گوتەبێژی بازاڕی دۆلارەکەی سلێمانی، ئەمڕۆ یەکشەممە بە تۆڕی میدیایی رووداوی گوت: "ئاڵۆزییەکانی ناوچەکە و دەستگیرکردنی سەرۆکی ڤەنزوێلا کاریگەرییان هەبووە لەسەر دابەزینی بەهای دینار".
گوتەبێژی بازاڕی دۆلارەکەی سلێمانی دەڵێ: "دەستگیرکردنی سەرۆکی ڤەنزوێلا کاریگەریی تەواوی دەبێ لەسەر دابەزینی نرخی نەوت، ئەوەش ئامانجی ئەمریکایە. بە دابەزینی نرخی نەوتیش بەهای دراوی عێراق دادەبەزێ و لە داهاتوودا کورتهێنان و هەڵاوسانیش دروست دەبێ".
ئەو پسپۆڕە داراییە دەڵێ: "لە ساڵی 2003ـەوە نزیکەی 750 ملیار دۆلار لە عێراقەوە براوەتە دەرەوە، گەندەڵییش بەردەوامە، بۆیە دابەزینی نرخی نەوت کاریگەریی 100%ـی لەسەر بەهای دینار دەبێت، ئێستاش خەڵک هەرچی دیناری هەیە دەیکاتە دۆلار".
حاجی سابیر باواجی، سەرۆکی ئەنجوومەنی بازاڕی ئاڵوگۆڕی دراو لە هەولێر، ئەمڕۆ یەکشەممە بە رووداوی گوت: "هۆکاری دابەزینی دینار زۆر هەن، دیارترینیان ئاڵۆزییەکانن".
باواجی دەڵێت: "ئاڵۆزییەکانی سعودیە و ئیمارات، گرژتربوونی پەیوەندییەکانی ئێران و ئەمریکا؛ دۆخی ئەمریکا و ڤەنزوێلا کاریگەریی راستەوخۆیان لەسەر دابەزینی بەهای دینار بەرامبەر دۆلار هەبووە".
بەهای دراوەکانی دیکە:
- یەک ملیۆن لیرەی سووریا بە 93 هەزار دینارە کە دەکاتە نزیکەی 64 دۆلار.
- 100 دۆلار بە حەواڵە بە 12 ملیۆن و 750 هەزار تمەنە. بە نەختیی 100 دۆلار بەرامبەر نزیکەی 11 ملیۆن تمەنە. لە بازاڕەکانی جیهانیدا 100 دۆلار بەرامبەر 13 ملیۆن و 790 هەزار تمەنە.
- 100 دۆلار بەرامبەر 4 هەزار و 302 لیرەی تورکیایە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ