رووداو دیجیتاڵ
لقی سلێمانیی بانکی ناوەندیی هەرێم روونکردنەوەیەکی لەبارەی ئەو رووداوەی هاتووچۆ بڵاوکردەوە کە ئەمڕۆ لە سنووری کەرکووک روویدا، کە تێیدا دوو ئۆتۆمبێلی گواستنەوەی پارەی، بەریەک کەوتن، بانکەکە دەڵێ "ئۆتۆمبێلەکە پەیوەندیی بە بانکی ناوەندیی هەرێم / سلێمانی ـیەوە نییە."
لە روونکردنەوەکەدا کە ئەمشەو (سێشەممە، 15-8-2023) بڵاوی کردووەتەوە، بانکی ناوەندیی هەرێم / سلێمانی دەڵێ "لە چەند پەیج و دەزگایەکی راگەیاندن هەواڵێک دەربارەی وەرگەڕانی ئۆتۆمبێلێکی گواستنەوەی پارە لە ناوچەی چیمەنی سەر بەپارێزگای کەرکووک بڵاوکراوەتەوە، کە ئەو ئۆتۆمبێلە پارەی لە بەغداوە بۆ بانکی ناوەندی هەرێم / سلێمانی گواستووەتەوە.''
بانکەکە هەروەها دەڵێ "بۆ ڕای گشتی و سەرجەم راگەیاندنەکانی روون دەکەینەوە؛ هیچ بڕە پارەیەک بەناوی مووچەی فەرمانبەران یان پارەی گەنمی جووتیاران راستەوخۆ لە بەغداوە بۆ سلێمانی نەهاتووە و ئەو ئۆتۆمبێلەی باس کراوە، هیچ پەیوەندییەکی بە بانکی ناوەندیی هەرێم / سلێمانیەوە نییە."
ئێوارەی ئەمڕۆ، هیوا حوسامەدین، پەیامنێری تۆڕی میدیایی رووداو لە کەرکووک لە بووڵتەنی کاژێر 17:00ـی رووداو کە سیما ئەبخزر پێشکێشی کرد، رایگەیاند، دوو ئۆتۆمبێلی گوللـە نەبڕ و زرێپۆش کە تایبەت بوون بە گواستنەوەی پارە لە بانکەکانی نێوان سلێمانی و کەرکووک، لە سلێمانییەوە بە ئاراستەی کەرکووک هاتوون، لە بازگەی چیمەن یەکێکیان تایەی تەقیوە و خۆی بە ئەوی دیکەدا کێشاوە."
پەیامنێری رووداو هەروەها گوتی ''هەردوو ئۆتۆمبێل پارەیان تێدا بووە و تووشی رووداوێکی هاتووچۆی گەورە بوون، بەڵام دوای کەمتر لە کاژێرێک لە رووداوەکە، دوو ئۆتۆمبێلی دیکەی گوللـەنەبڕ هاتوون و قاسەکانیان کردووەتەوە و پارەکانیان گواستوونەتەوە ئۆتۆمبێلەکانی دیکە لە رێوشوێنێکی ئەمنیی تووندا و، لە رووداوەکەدا کەس بریندار نەبووە."
هیوا حوسامەدین، پەیامنێری رووداو لە کەرکووک، وردەکاریی رووداوەکە باس دەکات:
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ