هەڵەیەک روویدا! دووبارە هەوڵبدە
رووداو دیجیتاڵ
بانکى ناوەندیى عێراق هۆشدارى دەداتە بانکە مۆڵەتپێدراوەکان و دامەزراوە داراییەکان کە نابێت جیاوازى لە بەهاى مامەڵەى دۆلارى چاپى کۆن و نوێ (سپى و شین) بکرێت و دەڵێت، "بەردەوامین لە وەرگرتنى ئەو چاپانەى دۆلار بەگوێرەى رێکارە نێودەوڵەتی و خۆجێییەکان."
ئەو هۆشدارییەی بانکی ناوەندیی عێراق لە روونکردنەوەیەکیدا بوو کە دووشەممە 16ی شوباتی 2026 بڵاوکرایەوە.
بانکی ناوەندی رایگەیاند، بانکە مۆڵەتپێدراوەکان و دامەزراوە داراییە نابانکییەکانی ئاگادار کردووەتەوە لەوەی، دەبێت جیاوازی لەنێوان نرخی دۆلاری ئەمریکیی چاپی کۆن و نوێ نەهێڵن.
لە بازاڕەکانی ئاڵوگۆڕی دراودا لە عێراق و هەرێمی کوردستان، بەهاى ئەو دوو جۆرەی دۆلار جیاوازە، بە جۆرێک لە پارێزگای سلێمانی 20% و لە هەولێر و دهۆک 30%ی دۆلاری سپی بە نرخی دۆلاری شین وەردەگیرێت. ئەگەر رێژەکە لەوە زیاتر بێت، نرخەکەی بۆ 100 دۆلار لەنێوان هەزار بۆ دوو هەزار دینار کەمتر دەکات.
بانکی ناوەندی دەڵێت، "پێویستە سەرجەم بانک و دامەزراوە داراییەکان پابەند بن بە مامەڵەی دراو و گۆڕینەوەی بەگوێرەی ئەو پێوەرانەی بۆ گۆڕینەوەی دراوی بیانی پشتیان پێ دەبەسترێت، بەتایبەت دۆلاری ئەمریکی، بەشێوەیەک کە رۆڵ ببینێت لە سەقامگیریی مامەڵە دراوییەکان و سەقامگیریی بازاڕ."
ئەو بانکە ئاماژەی بەوە داوە، یاسا و رێنوێنی و رێکارەکان هیچ جیاوازییەک ناکەن لەنێوان چاپە جیاوازەکانی دۆلار، بانکەکەش بەردەوامە لە وەرگرتن و مامەڵەکردن پێیانەوە لە رێگەی بانکە مۆڵەتپێدراوەکان، بەو مەرجەی لە چوارچێوەی پێوەر و رێکارە نێودەوڵەتی و خۆجێییەکان بێت.
جەبار گۆران، گوتەبێژی بازاڕی دۆلارەکەی سلێمانی بە تۆڕی میدیایی رووداوی راگەیاند، بانکی ناوەندی دۆلاری سپی و شین بە یەک نرخ وەردەگرێت، بەڵام هەندێک لە بانکەکان دۆلاری سپی وەرناگرن.
بانکی ناوەندیی عێراق رایگەیاندووە، ئەو روونکردنەوەیان لە چوارچێوەی پەرۆشییانە بۆ شەفافیەت و رێکخستنی کەرتی بانکی و پاراستنی مامەڵەکارانی دۆلار و پاڵپشتیی سەقامگیریی دارایی و ئابووری لە عێراق.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ