رووداو دیجیتاڵ
لە ئەنجامی بۆردوومانێکی ئیسرائیل بۆ سەر قاوەخانەیەک لە کەنار دەریای غەززە، دوو هونەرمەندی فەڵەستینی کوژران.
شێوەکار ئامینە سالمی (36 ساڵ) و دەرهێنەر و فۆتۆگرافەر ئیسماعیل ئەبو حەتەب (32 ساڵ)، لە ئەنجامی بۆردمانەکە کوژراون و ئەو دوو هونەرمەندە لەنێو لانیکەم 30 کەسدا بوون کە لەو هێرشەدا گیانیان لەدەستدا.
قاوەخانەکە لە ماوەی جەنگدا ببووە شوێنی کۆبوونەوەی رۆژنامەنووسان و هونەرمەندان، چونکە خزمەتگوزاریی ئینتەرنێت و بارگاویکردنەوەی تێدا بەردەست بوو.
دوایین کاری هونەریی ئامینە سالمی، 10 رۆژ پێش کوژرانی بڵاوی کردبووەوە، تابلۆیەک بوو کە وێنەی سێ ژنی کوژراوی پێشاندەدا و جەستەیان بە خوێن داپۆشرابوو.
رەفیق سالمی، برا بچووکی ئامینە لە بەلجیکاوە بۆ رۆژنامەی "The Art Newspaper"ـی راگەیاند، نزیکەی کاژێرێک بەر لە کوشتنی خوشکەکەی؛ لە پەیوەندیدا بووە لەگەڵی و بۆی نووسیوە: "رەنگە ژیان سەخت بێت، کاتێک بە تەنیای، دەمانخاتە دۆخێک کە هەست بە رادەی لاوازیمان بکەین و چەندە هێز لە ئازیزانمان وەردەگرین".
بۆردوومانەکە رۆژی دووشەممە 30ـی حوزەیرانی 2025 روویداوە و دوای کوژرانی، هاوڕێکانی وێنەی تەرمە خوێناوییەکەیان لە تەنیشت تابلۆکەوە بڵاوکردەوە، کە لێکچوونێک لە نێوان تەرمەکەی و کارە هونەرییەکەیدا بەدی دەکرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ