رووداو دیجیتاڵ
دوای ئەوەی پۆستەری کۆنسێرتێکی هاوبەشی هەردوو هونەرمەند کازم ساهیر و حوسێن جسمی لە هەولێر بڵاوکرایەوە، ژەنیارێکی کورد رایدەگەیەنێت، ئەو هەواڵە دوورە لە راستییەوە و هۆشداریش دەداتە هەوادارانی ساهیر.
سالار ئازید، ژەنیاری ناسراوی کورد، بە تۆڕی میدیایی رووداوی راگەیاند، کۆنسێرتی داهاتووی هونەرمەند کازم ساهیر لە ئیستەنبووڵ دەبێت و لە 9ـی ئەم مانگە بەڕێوەدەچێت، گوتیشی: "هیچ کۆنسێرتێکی لە هەولێر نابێت، وەک ئەوەی باس دەکرێت و بلیتەکەی بە شێوەی ئۆنلاین دەفرۆشرێت".
ئەو ژەنیارە کوردە ئاماژەی بەوەشکرد، پرسیارێکی زۆر لەبارەی کۆنسێرتەکەی هەولێرەوە دەکرێت، بەڵام "راستییەکەی ئەوەیە ئەو ماڵپەڕەی بلیتەکان بە شێوەی ئۆنلاین دەفرۆشێت، ساختەیە و پێویستە هەوادارانی ئاگاداربن و بلیتی نەکڕن".
سالار ئازید روونیشیکردەوە، تاکە سەرچاوەی باوەڕپێکراو بۆ زانینی هەواڵ و چالاکییەکانی ساهیر، هەژمارە فەرمییەکانیەتی لە تۆڕە کۆمەڵایەتییەکاندا.
جگە لە کۆنسێرتەکەی ئیستەنبووڵ، بڕیارە کازم ساهیر لە 14ـی ئەم مانگە کۆنسێرتێک لە ئوردن ساز بکات، دواتریش لە عومان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ