هەڤاڵ ئەبوبەکر، پارێزگاری سلێمانی
رووداو دیجیتاڵ
پارێزگاری سلێمانی و شاندێکی ژووری بازرگانیی سلێمانی، لە شاری ئییوی چینن و یاداشتنامەی بوونە دەستەخوشکی سلێمانی و ئییو واژۆکرا.
هەڤاڵ ئەبوبەکر، پارێزگاری سلێمانی لە کاتی بەشداریکردنی لە بووڵتەنی کاژێر 17:00ی تۆڕی میدیایی رووداوی راگەیاند: "ئەمە هەنگاوێکی گرنگە، شاری ئییو ئێستا پایتەختی جیهانە بۆ ئابووری و بازرگانی و پیشەسازی. بەرپرسانی شارەکە دوای لێکۆڵینەوەیەکی زۆر شاری سلێمانییان وەک دەستەخوشک هەڵبژارد."
هەڤاڵ ئەبوبەکر گوتی: "یاداشتێکی لێکتێگەیشتنی هاوبەش لەنێوان زانکۆی سلێمانی و ژووری بازرگانیی سلێمانی لەگەڵ شاری ئییو واژۆکرا. ئێمە لە سلێمانی پەیوەندیی راستەوخۆمان لەگەڵ نزیکەی 700 شاری جیهان هەیە."
بە گوتەی پارێزگاری سلێمانی، "بەرپرسانی شاری ئییو ئامادەی هەموو هاوکاری و هاوئاهەنگییەکن، لە ئاستی پەروەردە و فێرکردن، ژینگە، گەشەکردنی ئابووری و ئاڵوگۆڕی بازرگانی لەگەڵ سلێمانی."
هەڤاڵ ئەبوبەکر رایگەیاند: "رەوەندێکی کوردی بەهێزمان لێرە هەیە کە دەتوانن نوێنەرایەتییەکی باشی هەرێمی کوردستان بکەن. لە ئاییندەیەکی نزیکیشدا شاندێکی بەرپرسانی شاری ئییو سەردانی هەرێمی کوردستان دەکەن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ