هونەرمەند عەلی ئینانر
رووداو دیجیتاڵ
عەلی ئینانر، هونەرمەندێکی کوردە و خەڵکی دێرسمی باکووری کوردستان، ئەلبوومێکی نوێی دیجیتاڵی بڵاوکردەوە و لە 12 تراکی گۆرانی پێکهاتووە.
ئەلبوومەکە بریتییە لە کەڤەرکردنی بەرهەمی هونەرمەندانی دیکەی، گۆرانییەکان لە تێکستی ئارژەن ئاری، سەیدایێ تیرێژ، محەممەد چەتین، حوسێن ئەرسەلان و کەنعان جۆشکونە و یەکێک لە گۆرانییەکان بەرهەمی هونەرمەند رەنجبەر عەزیزە.
عەلی ئینانر، بە تۆڕی میدیایی رووداوی راگەیاند، ئەم بەرهەمە ئاوێتەکردنی میوزیک و گۆرانییە لەگەڵ هونەری شێوەکاری و تابلۆی شێوەکارانی چوار پارچەی کوردستانی وەک کەڤەری گۆرانییەکان لە یوتیوب بەکارهێناوە.
ئاماژەی بۆ ئەوەشکرد، تابلۆکان بەرهەمی هونەرمەندان لوقمان ئەحمەد، هێرۆ شێخە، هاکان یەشار، ئایشە قەرەجەداخ، موراد ئیپەک، قاسم سابیر و ئەرداڵ گڵداخە.
ئینانر روونیشیکردەوە، ئەلبوومە نوێیەکەی پڕۆژەیەکی هونەریی نەتەوەییە لە رێگەی هونەری شێوەکاری و میوزیک و گۆرانی. گوتیشی، پێویستە هونەرمەندانی کورد پاڵپشتی یەکدی بن، چونکە پێویستیان بە پاڵپشتییە.
ئەو هونەرمەندە کوردە کە دانیشتووی هەولێرە، بەنیازە بەشێک لە تراکەکانی ئەلبوومەکەی بەشێوەی ڤیدیۆکلیپ بڵاوبکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ