هونەرمەند هانی موجتەهیدی
رووداو دیجیتاڵ
هانی موجتەهیدی، هونەرمەندی کورد، نوێترین بەرهەمی بەناوی 'رۆحی هەتاو' بڵاوکردەوە کە کاری میوزیک و دابەشكردنی لەلایەن کوڕەکەی سیامەند کراوە.
بەرهەمەکە بەشێوەی دەنگ لە کەناڵی تایبەتی هانی لە یوتیوب بڵاوکراوەتەوە و کورتە ڤیدیۆیەک لەبارەیەوە بۆ تۆڕە کۆمەڵایەتییەکان ئامادەکراوە و لە هەژماری تایبەتییەکەی لە ئینستگرام بڵاوکراوەتەوە.
گۆرانییەکە لە تێکستی جەلال مەلکشایە و کاری میکس و ماسترینگی لەلایەن سیامەندی کوڕی کراوە.
هانی موجتەهیدی، بە تۆڕی میدیایی رووداوی راگەیاند، بەرهەمە نوێیەکەی یەکێک لە تراکەکانی نێو ئەلبوومە نوێیەکەی دەبێت و ئێستا لەگەڵ کوڕەکەی سیامەند کاری لەسەر دەکات و لە ماوەی داهاتوودا بڵاوی دەکاتەوە.
دوایین ڤیدیۆکلیپی هانی موجتەهیدی، بەناوی 'تەنیایی' لە نیسانی 2021 لە یوتیوبەکەی بڵاوکراوەتەوە و زیاتر لە 98 هەزار بینەری هەیە.
هانی موجتەهیدی لە 1980 لە سنەی رۆژھەڵاتی کوردستان لەدایکبووە، لە منداڵییەوە هۆنراوە و پەخشانی نووسیوە و دەستی وێنەکێشانی ھەبووە و لە بەرهەمی شانۆییدا بەشداربووە، لە 2000ـە دەستی بە گۆرانیگوتن کردووە و لە 2002 لە ئەڵمانیا نیشتەجێبووە.
یەکەم ئەلبوومی گۆرانیی بەناوی 'سەندرێلا' لە 2009 بڵاوکردەوە کە لە 11 تراکی گۆرانی پێکهاتووە و تێكرای ئاوازەکانی لەلایەن هونەرمەند هەڵکەوت زاهیر دانراون، دووەم ئەلبوومی بەناوی 'دایک' لە 2010 بڵاوکرایەوە و لە 11 تراکی گۆرانی پێکهاتووە و سەرجەم ئاوازەکانی لەلایەن هانی دانراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ