رووداو - هەولێر
سەرۆکی دەزگای لووتکە بۆ کاروباری ئاوارە و پەنابەران لەبارەی هەواڵی دیارنەمانی شیروان عەبدوڵڵا، هونەرمەندی میللی کوردستان، رایگەیاند، دوای ماوەیەک لە دەستگیرکردنی لە فڕۆکەخانەیەکی تورکیا، ئازادکراوە و ئەمشەو دەگەڕێتەوە لای کەسوکارەکەی لە ئەڵمانیا.
ئاری جەلال، سەرۆکی دەزگای لووتکە بۆ کاروباری ئاوارە و پەنابەران بە تۆڕی میدیایی رووداوی راگەیاند: " 23ی ئەم مانگە شیروان عەبدوڵڵا بەمەبەستی کاری هونەری سەردانی تورکیا دەکات و لەوێوە ویستوویەتی بچێتە تاران، بەڵام لە فڕۆکەخانە بۆ ماوەیەک دەستگیرکراوە و دواتر، ئازادکراوە".
سەرۆکی دەزگای لووتکە بۆ کاروباری ئاوارە و پەنابەران دەڵێت، بەگوتەی کەسوکارەکەی کە قسەیان بۆ ئەوان کردووە، شیروان عەبدوڵڵا ویستوویەتی لە تورکیاوە بچێتە تاران بەمەبەستی هەندێک کاری هونەری، بەڵام لە فڕۆکەخانەی تورکیا دەستگیرکراوە و دوای ماوەیەک ئازادکراوە. رەتیشیکردەوە کە ئەشکەنجەدرابێت.
ئاری جەلال دەڵێت، توانیمان لە ماوەیەکی کەمدا سۆراخی ئەو هونەرمەندە بزانین و پۆلیس خۆی وێنە بۆ ناردووین، کە سەلامەتە. دەشڵێت "هەر لە تورکیا تێکتی بۆ بڕدراوە و ئەمشەو دەگەڕێتەوە ئەڵمانیا بۆلای کەسوکارەکەی".
مەریوان عەبدوڵڵا، برای شیروان عەبدوڵڵا بە تۆڕی میدیایی رووداوی راگەیاند، لەکاتی گەیشتنی بە فڕۆکەخانە لە تورکیا هەندێک کێشەی لە ڤیزەکەیدا بۆ درووستبووە، بەڵام دواتر چارەسەرکراوە و ئەمڕۆش کاژێر 6:00 لە فڕۆکەخانەی تورکیاوە دەگەڕێتەوە بۆ ئەڵمانیا.
شیروان عەبدوڵڵا، هونەرمەندێکی میللی باشووری کوردستانەوە و هەواداری تایبەتی خۆی هەیە، لە ساڵی 1975 لە سلێمانی لەدایکبووە، خێزاندارە و خاوەنی سێ کوڕە. ماوەی چەند ساڵێکە لە ئەڵمانیا لەگەڵ کەسوکارەکەیدا دەژیت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ