د. تروسکە.
رووداو - تەندروستی
پسپۆڕێکی نەخۆشییەکانی خوێن ئاشکرای دەکات، دەرمانەکانی تالاسیمیا کاریگەریی لاوەکییان هەیە و مەرج نییە پەیوەندییان بە کواڵیتیی دەرمانەکەوە بێت، بەڵام ئەوانەی کە لە دەرمانە رەسەنەکەوە دووبارە دروستدەکرێنەوە دەکرێت کاریگەریی لاوەکییان زیاتر بێت.
ئەمڕۆ پێنجشەممە 13-2-2025 د. تروسکە ئاوات، پسپۆڕی نەخۆشییەکانی خوێن و لیمفەگرێیەکان لە بوولتەنی تەندروستیدا گوتی، دەرمانەکانی تالاسیمیا ئەگەر کواڵیتییان بەرز نەبێت، ئەوا کاریگەریی لاوەکیی زیاتر دروستدەکەن و سەرەتا ئەم نیشانانەی دەبێت؛
- سکچوون
- ئازاری سک
- تا
بەڵام ئەمانەی خوارەوە بە نائاسایی دادەنێت وەکو؛
- خوێنبەربوون
- پەککەوتنی گورچیلەکان
- لاوازبوونی فەرمانەکانی جگەر
د. تروسکە ئاوات جەخت لەوە دەکاتەوە کە نەخۆشییەکە لە باوانەوە دەگوازرێتەوە بۆ منداڵەکان و دەبێت لەکاتی پشکنینی پێش هاوسەرگیری، پشکنینی پێشوەختەی نەخۆشییەکە بکرێت.
لە زۆرێک لەو وڵاتانەی نەخۆشییەکەیان تێدا باوە، پەنا براوەتە بەر رێگەی چارەسەر و بنبڕکردنی درێژخایەنی گونجاو بۆ ئەوەی نەخۆشییەکە تێیاندا کەمبکرێتەوە، بەتایبەت وڵاتانی ئیتاڵیا، قوبرس و یۆنان کە پەنایان بردۆتە بەر میکانیزمێک کە بتوانن لە 10 ساڵدا نەخۆشییەکە کۆنتڕۆڵبکەن.
بە گوێرەی کۆمەڵەی پسپۆڕانی خوێن لە ئەمریکا نەخۆشیی تالاسیمیا بۆماوەییە و خڕۆکە سوورەکانی خوێن و هیمۆگڵۆبین کەمدەبنەوە، هەروەها هۆکارەکەی نەزانراوە، بەڵام ئەگەر دایک و باوک هەردووکیان هەڵگر بوون ئەوا منداڵی تووشبوویان دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ