رووداو - تەندروستی
فەرمانگەی تەندروستیی کەرکووک رایدەگەیێنێت، تووشبوویەکی تای خوێنبەربوون بە تەواوی لە نەخۆشییەکە چاکبووەتەوە و رەوانەی ماڵەوە کرا.
ئەمڕۆ دووشەممە 21-4-2025 سەباح نامیق، سەرۆکی بەشی تەندروستیی گشتی لە فەرمانگەی تەندروستیی کەرکووک بە رووداوی راگەیاند، ئەو تووشبووە دەرمانە رۆتینییەکانی دژەڤایرۆسیان پێداوە و خوێنیشیان بۆ گواستووەتەوە.
سەباح نامیق دەڵێت: ئێستا یەک تووشبووی تای خوێنبەربوون لە نەخۆشخانەی گشتیی کەرکووک ماوەتەوە و لەژێر چاودێریی ورددایە.
بۆچی تای خوێنبەربوون مەترسیدارە؟
تای خوێنبەربوون زیان بە موولوولە تەنکەکانی خوێن دەگەیێنێت و دووچاری خوێنبەربوونیان دەکات، هەر ڤایرۆسەکە ئاستەنگ لەبەردەم خوێنمەیاندن دروستدەکات، لەئەنجامدا خوێنبەربوونی ناوخۆیی لێدەکەوێتەوە و مەترسیی لەسەر ژیانی کەسی تووشبوو دروستدەکات.
نیشانەکانی تووشبوون بە تای خوێنبەربوون:
تا
شەکەتی و هەستکردن بە بێهێزی
سەرسووڕان
ئازاری ماسوولکە، ئێسک یاخود جومگەکان
هێڵنج و رشانەوە
سکچوون
رێگەکانی خۆپارێزی لە چەند خاڵێکدا
- پۆشینی پۆشاک و دەستکێش لەکاتی سەربڕینی ئاژەڵ
- پۆشینی پۆشاکی قۆڵدرێژ لەو شوێنانەی گومانی بوونی ڤایرۆسەکەی لێدەکرێت
- رشاندنی ژینگەی کارکردن
- دوورکەوتنەوە لە ژینگەی گوماناوی
- دوو هەفتە بەر لە سەربڕین، پشکنین بۆ ئاژەڵ بکرێت
- دوورکەوتنەوە لە کەسی تووشبوو
- دەستشۆردن لەدوای سەردانی نەخۆش
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ