د. راز سیروان - دکتۆر لونا خالید
رووداو - تەندروستی
پسپۆڕێکی نەخۆشییەکانی خانمان و منداڵبوون رێنوێنیی خانمانی دووگیان دەکات کە لە مانگی رەمەزاندا بە رۆژوو نەبن، بەتایبەتی ئەوانەی نەخۆشیی درێژخایەنیان هەیە.
ئەمڕۆ دووشەممە 23-2-2026 د. راز سیروان پسپۆڕی نەخۆشییەکانی خانمان و منداڵبوون لە بوڵتەنی تەندروستی رایگەیاند، باشترە خانمانی دووگیان بەڕۆژوو نەبن، بەتایبەت ئەو خانمانەی کە نەخۆشیی درێژخایەنی وەک بەرزەپەستانی خوێن و شەکرەیان هەیە.
بە گوتەی د. راز سیروان، خانمان لە 3 مانگی سەرەتا و کۆتایی دووگیانیدا نابێت بەڕۆژوو بن، چونکە لە 3 مانگی یەکەمدا ئەندامەکانی کۆرپەلە دروست دەبن و لە 3 مانگی کۆتاییشدا گەشەی کۆرپەلە زیاد دەکات.
د. راز سیروان، ئاماژەی بە چەند نیشانەیەک کرد کە ئەگەر لە خانمانی دووگیاندا دەرکەوتن، پێویستە رۆژووەکەیان بشکێنن، وەک تۆخبوونی رەنگی میز، هەوکردنی بۆرییەکانی میز و ئازاری سک.
سەبارەت بە 3 مانگی ناوەڕاستی دووگیانی، د. راز سیروان دەڵێت، "باشتر وایە خانمەکە رۆژ نا رۆژێک بەڕۆژوو بێت." هەروەها جەختی لەوە کردەوە کە خانمانی دووگیان ناتوانن دوو ژەمی گەورە بخۆن و پێویستە ژەمەکان بۆ 4 بۆ 5 ژەمی بچووکی پچڕ پچڕ دابەش بکرێن، چونکە خۆراکەکە بۆ کۆرپەلەکەش دەچێت.
ئەو پسپۆڕەی خانمان و منداڵبوون رێنوێنی دەدات کە باشتر وایە بە ئاو رۆژوو بشکێنرێت و لە پارشێڤدا خۆراکی تەندروست وەک هێلکە، ماست و سەوزە بخورێت و لە خۆراکی چەور، شیرینی و خواردنەوە گازییەکان دوور بکەونەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ