کۆبوونەوەی حیزبە کوردستانییەکان لە بارەگای سەرەکی بزووتنەوەی گۆڕان لە سلێمانی
رووداو - هەولێر
بەکۆی دەنگی حیزبە کوردستانییەکان عەبدولڕەحمان مستەفا فەتاح، پارێزگاری پێشووتری کەرکووک بە سەرۆکی قەوارەی هاوپەیمانی کوردستانی هەڵبژێردرا.
رەسوول رەئوف، ئەندامی سەركردایەتی حیزبی سۆسالیست دیموكراتی كوردستان و بەرپرسی مەڵبەندی ئەو حیزبە لە كەركووك بە تۆڕی میدیایی رووداوی راگەیاند: كۆدەنگی سەرجەم حیزبەكان لەسەر ئەوە دروستبوو، كە عەبدولڕەحمان مستەفا، پارێزگاری پێشووتری كەركووك بكرێتە سەرۆكی قەوارەی هاوپەیمانی كوردستانی.
ئەمڕۆ سێشەممە 1-10-2019 عەبدولڕەحمان مستەفا، بەشداری كۆبوونەوەی حیزبە کوردستانییەکانی لە مەکۆی سەرەکی بزووتنەوەی گۆڕان لە سلێمانی کرد و وەک سەرۆکی قەوارەی هاوپەیمانی کوردستانی هەڵبژێردرا.
لە كۆبوونەوەی ئەمڕۆی ئەو حیزبانەی قەوارەی هاوپەیمانی كوردستانییان دروستكردوە، پرسی لۆگۆ و دوورشمەكان یەكلای دەکەنەوە.
عەبدولڕەحمان مستەفا فەتاح
ساڵی (1951) لە شاری کەرکووک لە دایکبووە
ساڵی (1974) کۆلێژی یاسای زانکۆ بەغدای تەواوکردوە
لە ساڵی (1975) بۆ (2003) وەک پارێزەر کاریکردوە
لە 28-5-2003 بە یەکەم پارێزگاری کەرکووک دوای رووخانی رژێمی بەعس هەڵبژێردراوە
لە 3-4-2011 دەستی لەکارکێشایەوە
خێزاندارە و باوکی کوڕ و کچێکە
کوڕەکەی پارێزەر و کچەکەی ئەندازیارە
هاوپەیمانی كوردستانی، قەوارەیەكە لە نزیكەی 15 حیزبی كوردستانی دروستكراوە بۆ بەشداری لە هەڵبژاردنی ئەنجوومەنی پارێزگاكانی عێراق. كە بڕیارە لە رۆژی 1ی نیسانی 2020 بەڕێوەبچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ