سزاکانی سەر ئێران کاریگەری لەسەر بازاڕی دەستفرۆشان کردووە.
رووداو دیجیتاڵ
بازاڕی دەستفرۆشانی سنە لە شەقامە بەناوبانگەکەی فیردەوسی شارەکە، زۆربەی کات قەرەباڵخە و جمەی دێت لە کڕیار.
ئەیوب، فڕۆشیارە لە بازاڕەکە و باس لەوە دەکات، "لە وەرزی هاوین سعات 3 دێین تاوەکو 8 و نۆ، بەڵام لە زستاندا زووتر دەچینەوە لە کاتی دەوامی قوتابخانە قەرەباڵخە، بەڵام لە رۆژانی ئاسایی ئاوا قەرەباڵخ نییە، زیاتر چوارشەممە و پێنجشەممە قەرەباڵخ دەبێت."
هاونیشتمانییان بۆ کڕینی پێداویستییەکانیان بە نرخێکی هەرزانتر، سەردانی بازاڕەکە دەکەن.
کاوە، هاونیشتمانییەکی سنەیە و دەڵێت، "لە هەفتەیەک دوو بۆ سێ رۆژ دێین بۆ بازاڕی فیردەوسی، لێرە هەموو شتێک هەیە و هەرزانترە لە شوێنەکانی دیکە."
بە دەستپێکردنی ساڵی نوێی خوێندن، بازاڕی شتومەکی خوێندن گەرمترە لە کەلوپەلی دیکە، بەڵام بە گوتەی دەستفرۆشەکان، بەراورد بە پار فڕۆشیان کەمتر بووە.
هەڵاوسان و سەپاندنی سزاکان لەسەر ئێران، کاریگەری لە بازاڕی دەستفرۆشانی سنەش کردووە و بەشێکیان دەڵێن، بازاڕیان کز بووە.
ئومێد محەممەدخانی، فرۆشیارە و دەڵێت، "بەهۆی دۆلار و سزاکانەوە کەلوپەل گرانبووە. پێشتر شتەکانمان بە هەرزان دەکڕی و بە هەرزان دەمانفرۆشتەوە، بەڵام ئێستا بە گران دەیکڕین."
شەقامەکە جگە لەوەی بووەتە بازاڕێکی میللی بۆ دەستکەوتنی کەلوپەلی هەرزان، هاوکات بووەتە شوێنێک بۆ رێبواران و دانیشتووانی شار بۆ بەسەربردنی کات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ