رووداو دیجیتاڵ
لە 24 کاژێری رابردوودا لە پارێزگاکانی رۆژهەڵاتی کوردستان، لانیکەم چوار رووداوی هاتووچۆ روویانداوە و بەهۆیانەوە 15 کەس بریندار بوون و دوو کەسیش گیانیان لەدەستدا.
یەکێک لە رووداوەکان لە رێگەی روانسەر-جوانڕۆی سەر بە پارێزگای کرماشانی رۆژهەڵاتی کوردستان بوو کە لە نێوان دوو ئۆتۆمبێلی تایبەت لە جۆری پیژۆ پارس و پراید روویدا؛ مەسعود قەلعە سفیدی، بەرێوەبەری فریاکەوتنی خێرای پارێزگاکە رایگەیاند، لە رووداوەکەدا 10 کەس بریندار بوون.
هاوکات، لەسەر رێگەی سونقر-بێستوونی سەر بە کرماشان، بارهەڵگرێک و دوو ئۆتۆمبێلی تایبەت لە جۆری پراید پێکیاندادا؛ بەگوتەی محەممەدباقر محەممەدی، بەڕێوەبەری گشتیی مانگی سووری پارێزگاکە، کەسێک گیانی لەدەستداوە و سەرنشینێکی دیکەیش بریندار بووە.
لە نزیک خوڕەمئاوای پارێزگای لوڕستانیش، ئۆتۆمبێلێکی تایبەت لە جۆری پیژۆ 405 وەرگەڕا و بەهۆیەوە شۆفێری ئۆتۆمبێلەکە گیانی لەدەستدا و دوو سەرنشینی دیکەش بریندار بوون.
محەممەد زارعی، بەڕێوەبەری پۆلیسی هاتووچۆی پارێزگاکە لەبارەی هۆکاری رووداوەکەوە دەڵێت، بەهۆی بارانبارین و خێرایی زۆرەوە، ئۆتۆمبێلەکە لە کۆنترۆڵ دەرچووە و خۆی بە راگرەکانی تەنیشت رێگەدا کێشاوە.
هەروەها لەسەر رێگەی مهاباد-میاندواوی سەر بە پارێزگای ورمێ، بارهەڵگرێک و دوو ئۆتۆمبێلی تایبەت لە جۆرەکانی نیسان و سەمەند پێکیاندادا و بەهۆیەوە دوو کەس بریندار بوون. بەگوتەی حەمید مەحبووبی، بەڕێوەبەری مانگی سووری پارێزگاکە، دوای دەرهێنانەوەیان، بریندارەکان گەیێندراونەتە نەخۆشخانە.
بەگوێرەی راپۆرتی دادپزیشکیی ئێران لە 21-03-2024ـەوە تاوەکو 21-07-2024، 6 هەزار و 262 کەس لە ئێران و رۆژهەڵاتی کوردستان لە رووداوی هاتووچۆدا گیانیان لەدەستداوە و 127 هەزار و 350 کەسیش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ