رووداو دیجیتاڵ
بەیانی ئەمڕۆ یەکشەممە شێخ ئەحمەد شێخ مەلا محەممەد خەیلانی، کەسایەتیی دیاری شاری هەولێر کۆچی دوایی کرد، بەرپرسی راگەیاندنی یەکێتی زانایانی ئایینی ئیسلامیی کوردستان دەڵێت: "ساڵانێکی زۆرە ئەو خانەوادەیە خزمەتی ئایینی ئیسلام و لایەنی کۆمەڵایەتی و نەتەوەیی دەکەن و لەدەستدانی خەسارەتێکی گەورەیە".
بەیانی ئەمڕۆ یەکشەممە 2-1-2022، شێخ ئەحمەد خەیلانی، کەسایەتی ئایینی دیاری شاری هەولێر کۆچی دوایی کرد، مەلا عەبدوڵڵا شێرکاوەیی، بەرپرسی راگەیاندنی یەکێتی زانایانی ئایینی ئیسلامیی کوردستان لەوبارەیەوە بە تۆڕی میدیایی رووداوی راگەیاند: "مامۆستا شیخ ئەحمەد خەیلانی لە بنەماڵەیەکی ئایینپەروەر و نیشتیمانپەروەری خزمەتکار بە ئایینی ئیسلام بووە و بە درێژایی تەمەنیان ئەو خێزانە خزمەتی ئایینی ئیسلامیان کردووە و لە خزمەتی خێر و خێرخوازی و کاری مرۆڤایەتیی بوون".
مەلا عەبدوڵڵا شێرکاوەیی هەروەها دەڵێت: "شێخ ئەحمەد خەیلانی، کەسایەتییەکی کۆمەڵایەتی گەورە بووە، کە رۆڵی زۆری هەبووە لە چارەسەرکردنی زۆر کێشەی کۆمەڵایەتی و هێنانەکایەی سوڵح و ئاشتەوایی لەنێوان خەڵکدا، بۆیە لەدەستدانی شێخ ئەحمەد خەیلانی زیانێکی گەورەیە و خوا بە بەهەشتی راسپیرێت".
بەرپرسەکەی یەکێتی زانایانی ئیسلامیی کوردستان ئاماژەی بەوەدا شێخ ئەحمەد خەیلانی، ئەهلی تەسەوف بووە و لەسەر تەریقەتی نەقشبەندیی بووە و مزگەوتێکی گەورەیان هەیە لە شاری هەولێر و حوجرەی خۆیان هەیە و فەقێیەکی زۆریان پەروەردەکردووە و هەمووی لەسەر ئەرکی خۆیان بە سەرپەرشتی خۆیان کارەکان دەکەن و خزمەتی باشیان کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ