رووداو دیجیتاڵ
ئاگر لە کەمپی شاریای ئاوارەکان لە پارێزگای دهۆک کەوتەوە. پەیامنێری رووداو دەڵێ، ئاگرەکە زیانی گیانی نەبووە، بەڵام دوو خێوەت بە تەواوی سووتاون.
ئاگرەکە بەیانیی ئەمڕۆ هەینی 02-01-2026 لە دوو خێوەتی ئاوارەکانی نێو کەمپەکەدا کەوتەوە. نایف رەمەزان، پەیامنێری تۆڕی میدیایی رووداو لە شوێنی رووداوەکەوە رایگەیاند، لە ئەنجامی ئاگرەکەدا، خێوەتەکان بە تەواوی سووتاون و سەرجەم ئەو کەلوپەلانەی تێیاندا بوون، لەنێوچوون.''
بەگوێرەی زانیارییە سەرەتاییەکان، ئاگرەکە بەهۆی شۆرتی کارەباوە کەوتووەتەوە. شایەتحاڵێک قسەی بۆ پەیامنێری رووداو کرد و گوتی، ''بەیانی لەناکاو بینیم گڕ لە خێوەتەکان بەرز دەبێتەوە. بەرگریی شارستانیمان ئاگادار کردەوە و دوای نزیکەی 20 خولەک تیمەکانیان گەیشتن.''
بەگوتەی ئەو شایەتحاڵە، نزیکەی پێنج منداڵ لە خێوەتەکاندا بوون، بەڵام دەستبەجێ لەلایەن خەڵکەوە رزگار کراون.
رووداوەکە هیچ زیانێکی گیانی لێنەکەوتووەتەوە و تیمەکانی بەرگریی شارستانی سارقاڵی لێکۆڵینەوە لە هۆکاری سەرەکیی ئاگرکەوتنەوەکەن.
کەمپی شاریا تایبەتە بە ئاوەرەکانی کوردانی ئێزدی کە دوای ساڵی 2014 و هێرشی داعش بۆ سەر شنگال، ئاوارە بوون.
ئەمە جاری یەکەم نییە ئاگر لە کەمپی شاریا دەکەوێتەوە؛ رۆژی 01-07-2024ـیش نزیکەی 10 خێوەت لەنێو کەمپەکەدا بە تەواوی سووتان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ