رووداو دیجیتاڵ
جووڵانەوەی نەوەی نوێ رایگەیاند، بڕیاری سزادانی سەرۆکی حیزبەکەیان "بێ بەڵگە و شایەت و چاوەڕوانکراو" بووە. دادگەی سلێمانیش رەتیدەکاتەوە و دەڵێت، دۆسیەیەکی یاسایی بووە.
ئەمڕۆ سێشەممە 02-09-2025 دادگەی سلێمانی سزای پێنج مانگ بەندکردنی بەسەر شاسوار عەبدولواحید، سەرۆکی نەوەی نوێدا سەپاند. دوای بڕیارەکە حیزبەکە راگەیێندراوێکی بڵاوکردەوە.
لە راگەیێندراوەکەدا هاتووە: "بڕیارەکەی ئەمڕۆی دادگەی سلێمانی بۆ ئێمە و هەموو خەڵکی ئازیزی هەرێمی کوردستان چاوەڕوانکراوبوو، چونکە کاتی دەستگیرکردنی کاک شاسوار و هەڵکوتانە سەر ماڵەکەی لە نیوەشەودا لەلایەن هێزێکی دامامکدارەوە و نەبوونی هیچ بەڵگە و شایەتێک لە کەیسەکەدا، بە روونی پێیگوتین چ دەرئەنجامێک لە بڕیاری دادگە دەکەوێتەوە".
نەوەی نوێ رایگەیاندووە، لە جاران بەگوڕتر کار دەکەن و درێژەپێدەری رێگە و دیدگەی سەرۆکەکەیان دەبن. دەشڵێن: "دەستگیرکردنی شاسوار عەبدولواحید نەوەی نوێ و سەرۆکەکەی لەناو خەڵک خۆشەویستتر دەکات و ئێمە نەک هەر سارد نابینەوە، بەڵکو کارێک دەکەین کاک شاسوار و خەڵکی هەرێمی کوردستان سەریان پێمان بەرز بێت".
لە کۆتایی راگەیێندراوەکەدا نەوەی نوێ دەڵێت: "لە ئێستاوە بۆ هەڵبژاردنی پەرلەمانی عێراق کە لە 11-11ـی ئەمساڵدا ئەنجام دەدرێ هەموو ئامادەکارییەکمان کردووە و ئامادەین".
سەرچاوەیەک لە دادگەی سلێمانی بە تۆڕی میدیایی رووداوی گوت: "سزادانەکە بەگوێرەی یاسابووە، دادوەر پێشتر شەش مانگ حوکمی داوە، ئەمڕۆ دادوەری کەتن سزاکەی کەمکردەوە بۆ پێنج مانگ".
سەرچاوەکەی دادگەی سلێمانی گوتیشیی: "شاسوار عەبدولواحید بە کەیسێکی یاسایی و لەسەر سکاڵایەکی یاسایی ئافرەتێک بەناوی شادی نەوزاد سزادراوە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ