رووداو دیجیتاڵ
تاوەکو ئەمڕۆ باران نەباریوە. رووداو پێشبینیی سێ شارەزای کەشناسی وەرگرتووە و دەڵێن، نێوەڕاستی ئەم مانگە باران لە هەرێمی کوردستان دەبارێت.
مانگ و نیوێکە کەوتووینەتە وەرزی پاییزەوە، بەڵام تاوەکو ئەمڕۆ باران نەباریوە. کەشناسێک بە گەشبینییەوە دەڵێت، "کۆتایی پاییز، زستان و بەهار باراناوی دەبن." کەشناسێکی دیکە پێشبینی دەکات، مەترسیی وشکەساڵیی کشتوکاڵی لە زۆرینەی هەرێمی کوردستان نەبێت.
د. لوقمان موفتی، شارەزای کەشناسی، ئەمڕۆ یەکشەممە بە تۆڕی میدیایی رووداوی گوت، "نێوەڕاستی ئەم مانگە گۆڕان لە کەشوهەوای هەرێمی کوردستان دروست دەبێ و باران دەبارێت."
ئەو شارەزایەی کەشوهەوا دەڵێت، "لە زۆرینەی هەرێمی کوردستان و بەتایبەت ناوچەی بارانی مسۆگەر، ئەم ساڵ مەترسیی وشکەساڵیی کشتوکاڵی نابێ، بەڵام دۆخەکە بەم شێوەیەی ئێستا بێت مەترسیی لەسەر کشتوکاڵ لە دەشتی هەولێر، ئیدارەی گەرمیان و کەرکووک دەبێت."
محەممەد کەمال، شارەزای کەشناسییە و لەبارەی دواکەوتنی بارانەوە دەڵێت، "ئەم وشکییە کاتییە کە ناوچەکەمانی گرتووتەوە، نەبوونی شێی پێویست وایکردووە هەور لە ناوچەکان چڕ نەبێتەوە، هەروەها بەهۆی دیاردەی لانینا بە لاوازی لەسەر زەریای هێمن و چڕبوونەبوونەوەی هەور لە دەریای نێوەڕاست، دەریای سوور و کەنداوی عەرەبی هۆکاری نەبوونی بارانە، هەروەها پەستانی ناوچەکەمان بەرزە و لەو ناوچانە هەوریش هەبێ ناگاتە هەرێمی کوردستان."
ئەو کەشناسە گەشبینە بە وەرزی بارینی ئەم ساڵ و بە تۆڕی میدیایی رووداوی گوت، "ئەم وشکییە نێوەڕاستی ئەم مانگە کۆتایی دێ و باران دەبارێ، بەڵام بارانی بەهێز و زۆر باش ئەم ساڵ دەکەوێتە دوای 25ـی مانگی 12."
شاڵاو هیدایەت، پێشبینیکارێکی دیکەی کەشوهەوایە و هاوڕایە لەگەڵ کەشناسەکانی دیکە و دەڵێت، "نێوەڕاستی ئەم مانگە یەکەم بارانی سەتاسەری دەبارێت، بەڵام چونکە سەرەتایە و گشتگیرە، بڕەکەی هێندە نابێت پەڵە بدات."
شاڵاو هیدایەت پێشبینی دەکات، "ئەم ساڵ لە کۆتایی پاییزدا لە بەشی کۆتایی مانگی 12 لە تەواوی هەرێمی کوردستان پەڵە بدات."
ئەو کەشناسە ئاماژەی بەوە کرد، ئەو و چەند کەشناسێکی دیکەی هاوکاری، پێشبینییان هاوشێوەی یەکە، "بڕی بارانی ئەم وەرزە زیاتر دەبێ لە وەرزیی بارینی رابردوو."
بە گوتەی شاڵاو هیدایەت، ئەم وەرزەی بارین بەراورد بە وەرزی پێشوو، لە تەواوی ناوچەکان بارانی زیاتر دەبێت؛ گوتیشی، "کۆتایی پاییزی ئەم ساڵ زۆر باش دەبێت، زستان ئاسایی دەبێت و بەهاریش باراناوی."
وەرزی پێشووی باران
بەگوێرەی داتای بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان بۆ رووداو، وەرزی بارینی پێشوو لە سەرەتای مانگی 10 تاوەکو نێوەڕاستی مانگی چواری ئەم ساڵ، بەراورد بە وەرزی پێشووتری باران کەمتر بووە و بەم شێوەیە بووە:
پارێزگای هەولێر: 109.5 ملیمەتر.
پارێزگای سلێمانی: 319 ملیمەتر.
پارێزگای دهۆک: 124.8 ملیمەتر.
پارێزگای کەرکووک: 142.3 ملیمەتر.
پارێزگای هەڵەبجە: 376.4 ملیمەتر.
وەرزی پێشووی بارانبارین لە سنووری پارێزگای هەولێر بە رێژەی 78% کەمی کردبوو، لە سلێمانی 46%، لە دهۆک 83%، لە هەڵەبجە 42% و لە کەرکووک 45% کەمیکردبوو بەراورد بە وەرزی پێشووتر.
وەرزی بارینی ساڵی 2023 بۆ 2024 باران باشتربووە، تاوەکو 5ی نیسانی 2024 بەم شێوەیە بوو:
پارێزگای هەولێر: 485.3 ملیمەتر.
پارێزگای سلێمانی: 586.1 ملیمەتر.
پارێزگای دهۆک: 724.4 ملیمەتر.
پارێزگای کەرکووک: 256.4 ملیمەتر.
پارێزگای هەڵەبجە: 647.3 ملیمەتر.
پێشبینی کەشناسیی هەرێمی کوردستان بۆ ئەمڕۆ و سبەی
کەشناسیی هەرێمی کوردستان رایگەیاند، ئەمڕۆ پلەی گەرما هاوشێوەی دوێنێ دەبێت و ئاسمان ساماڵ دەبێت. لەبارەی سبەیەوە کەشناسی دەڵێت: "ئاسمان ساماڵ و پەڵەهەور دەبێت. پلەی گەرما بەراورد بە ئەمڕۆ کەمێک بەرز دەبێتەوە."
بەگوێرەی کەشناسیی هەرێمی کوردستان، بەرزترین پلەی گەرما سبەی بەم شێوەیە دەبێت:
هەولێر؛ 29 پلەی سیلیزی
سلێمانی؛ 28 پلەی سیلیزی
دهۆک؛ 28 پلەی سیلیزی
زاخۆ؛ 29 پلەی سیلیزی
ئامێدی؛ 24 پلەی سیلیزی
ئاکرێ؛ 29 پلەی سیلیزی
کەرکووک؛ 30 پلەی سیلیزی
هەڵەبجە؛ 28 پلەی سیلیزی
سۆران؛ 28 پلەی سیلیزی
حاجی ئۆمەران؛ 22 پلەی سیلیزی
گەرمیان؛ 32 پلەی سیلیزی
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ