هەڵەیەک روویدا! دووبارە هەوڵبدە
دیمەنێکی گشتیی کەرکووک
رووداو دیجیتاڵ
سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان دەڵێت، حکومەتی عێراق پابەندی هیچکام لەو رێککەوتن و بڕیارانە نەبووە، کە بۆ پرسی سەرژمێری لە ناوچە کوردستانییەکان دەرکرابوون، زیادبوونی ژمارەی دانیشتووانی کەرکووک لە 388 هەزار کەسەوە بۆ سەرووی 2 ملیۆن کەس بە "ژمارەیەکی گەورە و جێگەی گومان" ناودەبات.
فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان لە کاتی بەشداریکردنی لە بووڵتەنی کاژێر 12:00ـی تۆڕی میدیایی رووداو، کە سەنگەر عەبدولڕەحمان پێشکێشی کرد، نیگەرانیی خۆی لە شێوازی راگەیاندنی ئەنجامەکانی سەرژمێری دەربڕی.
"گومانەکانمان بوونە راستی"
فەهمی بورهان دەڵێت، پێش سەرژمێریی ساڵی 2024، وەک دەستەی ناوچە کوردستانییەکان هەموو نیگەرانییەکانی خۆیان خستووەتەڕوو و هۆشدارییان داوە لەوەی ئەم پرۆسەیە لەم کاتەدا دەکرێت بکرێتە دۆسیەیەکی سیاسی.
سەرۆکی دەستەی ناوچە کوردستانییەکان گوتی: "بەداخەوە ئەوەی بینیمان لە دوای راگەیاندنی ئەنجامەکان، پێچەوانەی هەموو ئەو بەڵێن و بڕیارانە بوو کە پێشتر بە وەزارەتی پلاندانانی هەرێمی کوردستان و حکومەتی هەرێمی کوردستان درابوون، ئەم پابەندنەبوونە بێ متمانەیی نێوان هەردوو لا فراوانتر دەکات".
بە گوتەی فەهمی بورهان، سەرەڕای دەرچوونی کۆمەڵێک بڕیاری باش لەلایەن ئەنجوومەنی وەزیرانی عێراقەوە لە 7ی تشرینی دووەمی 2024 بۆ رەواندنەوەی نیگەرانییەکان، بەڵام "هیچکام لەو بڕیارانە جێبەجێ نەکران"، بەتایبەتی بڕیاری رانەگەیاندنی ئەنجامەکان تاوەکو ئەو کاتەی پۆڵێنکاری و وردبینی لە داتاکانی ناوچە کوردستانییەکان دەکرێت.
جەڵتەی دیمۆگرافی لە کەرکووک
سەبارەت بە ئەنجامی سەرژمێری لە کەرکووک، فەهمی بورهان بەراوردکارییەکی لەنێوان سەرژمێریی ساڵی 1957 و 2024 کرد و ژمارەکانی بە "مەترسیدار" وەسف کرد.
فەهمی بورهان گوتی: "لە سەرژمێریی ساڵی 1957 دانیشتووانی کەرکووک 388 هەزار کەس بووە، بەڵام لە ساڵی 2024 بووەتە 2 ملیۆن و 36 هەزار و 627 کەس. ئێمە مافی خۆمانە بپرسین ئەم ژمارە گەورەیە چۆن زیاد بووە؟ ئایا ئەمە پێچەوانەی ماددەی 140ـە یان تەواوکارییەتی؟"
فەهمی بورهان ئاماژەی بەوەش دا، هیچ پارێزگایەکی عێراق، تەنانەت لە باشوور و ناوەڕاستیش، بەو قەبارەیە گەشەی دانیشتووانی بەخۆیەوە نەبینیوە و گوتی: "ئەم ژمارەیە جێگەی گومانە و ئەگەر بە وردی لێی بکۆڵینەوە تێدەگەین ئەو مەترسییانەی پێشتر باسمان دەکرد، ئێستا بوونەتە واقیع".
مەترسی لەسەر ماددەی 140
سەرۆکی دەستەی ناوچە کوردستانییەکان هۆشداری دا لەوەی پشتبەستن بە سەرژمێریی 2024 مەترسی لەسەر جێبەجێکردنی ماددەی 140 دروست دەکات، چونکە بڕیار بوو سەرژمێریی ساڵی 1957 بکرێتە بنەما و ئەو خێزانانەی لە دوای ئەو ساڵەوە بۆ تەعریب هێنراونەتە شارەکە، داتاکانیان بگەڕێنرێتەوە بۆ شوێنی رەسەنی خۆیان.
فەهمی بورهان گوتی: "ئێستا دۆخێک دروست بووە کە دەبێت سەرژمێریی 2024ـیش بکرێتە دۆسیەیەکی سەرەکی لە گفتوگۆکانی پێکهێنانی حکومەتی داهاتووی عێراق، چونکە ئەم ئەنجامانە گۆڕانکاریی گەورەی بەسەردا هاتووە".
یاسای زەوییە کشتوکاڵییەکان
لە بەشێکی دیکەی قسەکانی دا، فەهمی بورهان باسی لە یاسای هەڵوەشاندنەوەی بڕیارەکانی ئەنجوومەنی سەرکردایەتیی شۆڕشی هەڵوەشاوە کرد تایبەت بە زەوییە کشتوکاڵییەکان و بە "دەسکەوتێکی باش"ـی ناوبرد، بەڵام جەختی لەوە کردەوە کە گرنگتر لە دەرچوونی یاساکە، دەرچوونی رێنماییەکان و جێبەجێکردنیەتی.
فەهمی بورهان گوتی: "بەشێکی زۆری گرفتەکانمان لەگەڵ وەزارەتەکانی بەرگری و نەوت و دارایی عێراقە، کە زەوییەکانیان داگیر کردووە. بۆ نموونە لە تۆپزاوا ویستمان مۆنۆمێنتی ئەنفال دروست بکەین، بەڵام بە بیانووی ئەوەی زەوییەکە هی وەزارەتی بەرگرییە، رێگەیان نەدا".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ