رووداو دیجیتاڵ
بە گوتەی بەرپرسانی ورمێ و لوڕستان، لە چوار رووداوی هاتووچۆدا لەو دوو پارێزگایەی رۆژهەڵاتی کوردستان، سێ هاونیشتمانی گیانیان لەدەستداوە و 11ـی دیکەش بریندار بوون.
میدیای ئێران بڵاویکردەوە، رۆژی هەینی چوار رووداوی هاتووچۆ لە رۆژهەڵاتی کوردستان روویانداوە کە سیانیان لە پارێزگای ورمێ و ئەوی دیکەش لە لوڕستان بووە.
بەڕێوەبەرایەتی بەرگریی شارستانیی خورماوا لە پارێزگای لوڕستان دەڵێت: "ئۆتۆمبێلێک خۆی بە دیواری پردێکدا کێشاوە و لە ئەنجامدا دوو هاووڵاتی گیانیان لەدەستداوە و دووی دیکەش بریندار بوون."
حەمید مەحبووبی، بەڕێوەبەری مانگی سووری پارێزگای ورمێش دەڵێ: "دوو رووداوی هاتووچۆ لە رێگەی مەهاباد – ورمێ روویاندا، لە ئەنجامدا هاووڵاتییەک گیانی لەدەستدا و 6 ـی دیکەش بریندار بوون."
حەمید مەحبووبی هەروەها گوتی: "لە رووداوێکی دیکەدا لە رێگەی مەهاباد – ورمێ، دوو ئۆتۆمبێلی جۆری ئێل 90 و هایما پێکیاندادا و لە ئەنجامدا دوو هاووڵاتی بریندار بوون."
بەڕێوەبەری مانگی سووری پارێزگای ورمێ هەروەها گوتی: "لە رووداوێکی دیکەدا لە رێگەی نێوان ورمێ – سێرۆ، سێ هاووڵاتی بریندار بوون. رووداوەکە لە نێوان دوو ئۆتۆمبێلی جۆری پێژۆ پارس و پێژۆ 405 بووە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ