رووداو دیجیتاڵ
دەزگای ئاسایشی هەرێمی کوردستان راگەیێندراوێکی بڵاوکردەوە و تێیدا رەتیدەکاتەوە هیچ رۆژنامەنووسێکی فەرەنسیی لە سلێمانی دەستگیرکردبێت و، دەڵێ "لەلایەن ئاسایشەوە بەڕێزەوە گواستراونەتەوە بۆ نێو شاری سلێمانی و بۆ پاراستنی گیانیان لە ناوچەکە دوورخراونەتەوە".
دەزگای ئاسایشی هەرێمی کوردستان لە راگەیێندراوێکدا کە ئەمشەو (شەممە، 3-6-2023) بڵاویکردەوە دەڵێ رۆژنامەنووسە فەرەنسییەکە ناوی بێنوا بنیامین جۆسێفە، لەگەڵ هاوەڵە وەرگێڕەکەی سەردانی ناوچەی گەڵاڵەی ماوەتیان کردووە لە 2ـی 6ـی 2023 و بۆ پاراستنی سەلامەتیی گیانی خۆیان، لەلایەن هێزەکانی ئاسایشەوە ئاگادارکراونەتەوە لەوەی ئەو ناوچەیە مەترسیدارە.
لە بەشێکی دیکەی راگەیێندراوەکەدا باس لەوە کراوە، رۆژنامەنووسە فەرەنسییەکە و هاوەڵە وەرگێڕەکەی "لەلایەن هێزەکانی ئاسایشەوە بەڕێزەوە مامەڵەیان لەگەڵدا کراوە و داوایان لێکراوە لەپێناو پاراستنی گیانی خۆیان ئەو ناوچەیە جێبێڵن، چونکە لە ڕووی ئەمنییەوە ئەو شوێنە هەستیارە و لەوکاتەشدا درۆن بە ئاسمانی ناوچەکەدا سوڕاوەتەوە".
کۆنسوڵخانەی گشتیی فەرەنسا لە هەولێر ئێوارەی ئەمڕۆ راگەیەندراوێکی بڵاوکردەوە و رایگەیاند بەشێوەیەکی "هەڕەمەکی" رۆژنامەڤانێکی فەرەنسی و کچە هاوکارەکەی لە سلێمانی دەستگیرکراون و دواتر ئازادکراون.
کۆنسوڵخانەکە "بە تووندترین" شێوە سەرکۆنەی دەستگیرکردنەکەی کرد و رایگەیاند "دڵگرانین بەو دەستدرێژییە بەردەوامانەی دەکرێنە سەر ئازادیی رۆژنامەگەری و مافەکانی رۆژنامەڤانان لە سەرتاسەری هەرێمی کوردستان. ئەم رووداوەش نموونەیەکی دیکەی ئەم دەستدرێژییانەیە".
کۆنسوڵخانەکە سوپاسی ئەو دەسەڵاتدارانەی کرد "کە بەشدار بوون لە کردنەوەی گرەوی ئەم دۆخە"، بەبێ ئەوەی ناویان بهێنێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ