رووداو دیجیتاڵ
سەکۆی جیهانیی "پۆلیمارکێت" بۆ پێشبینییە داراییەکان ئاشکرای دەکات، ئەگەری راگەیاندنی دەوڵەتێکی سەربەخۆ لە رۆژهەڵاتی کوردستان گەیشتووەتە 38%. ئەمەش لەکاتێکدایە ئێران بەهۆی جەنگی ئەمریکا و ئیسرائیلەوە، رووبەڕووی بۆشاییەکی گەورەی دەسەڵات و پەککەوتنی دامەزراوە ئەمنییەکان بووەتەوە.
رۆژی چوارشەممە، 4ـی ئاداری 2026، ماڵپەڕی پۆلیمارکێت بازاڕێکی نوێی بۆ پێشبینیکردنی داهاتووی سیاسیی کورد لە ئێران کردەوە. بەگوێرەی مەرجەکانی ئەم بازاڕە، ئەگەر هەر یەک لە پارتەکانی (پژاک، حدکا، کۆمەڵە، یان پاک) تاوەکو پێش 30ـی حوزەیرانی ئەمساڵ، بە فەرمی دەوڵەتێکی سەربەخۆ لە بەشێکی خاکی ئێران رابگەیێنن، ئەوا پێشبینییەکە بە "بەڵێ" یەکلایی دەبێتەوە.
بەرزبوونەوەی ئەم ئەگەرە بۆ نزیکەی 40%، هاوکاتە لەگەڵ پەرەسەندنی هێرشەکانی ئۆپەراسیۆنی "نەڕەی شێر" کە تێیدا زۆربەی سیستمەکانی بەرگریی ئاسمانیی ئێران لە ناوچە سنوورییەکان پەکخراون. راپۆرتە سیاسییەکان ئاماژە بەوە دەکەن، تێکچوونی زنجیرەی فەرماندەیی لە تاران، زەمینەیەکی گونجاوی بۆ پارتە ئۆپۆزیسیۆنەکان رەخساندووە تاوەکو پێگەی خۆیان بەهێز بکەن.
پۆلیمارکێت ئاماژە بەوە دەکات کە تەنیا "راگەیاندنێکی گشتیی فەرمی" لەلایەن سەرکردایەتیی ئەم پارتانەوە بەسە بۆ بردنەوەی گرەوەکە، بێ گوێدانە ئەوەی ئایا ئەو دەوڵەتە لە رووی دیپلۆماسییەوە دەناسرێت یان دەسەڵاتی کارگێڕیی تەواوەتی دەسەپێنێت.
ئێستا لەو سەکۆیەدا، هەر پشکێکی "بەڵێ" بە 38 سەنت دەفرۆشرێت. ئەگەر سەربەخۆیی رابگەیێندرێت، بەهای هەر پشکێک دەبێتە یەک دۆلار و ئەوانەی وەبەرهێنانیان تێدا کردووە قازانجێکی گەورە دەکەن.
پۆلیمارکێت کە گەورەترین بازاڕی پێشبینییە لە جیهاندا و پشت بە تەکنەلۆژیای "بلۆکچەین" دەبەستێت، جیاواز لە راپرسییەکان، پشت بە "ژیریی بەکۆمەڵ" دەبەستێت؛ چونکە خەڵک پارەی خۆیان لەسەر راستیی پێشبینییەکان دادەنێن. شارەزایان دەڵێن کاتێک رێژەی پێشبینییەک دەگاتە سەرووی 30%، ئەوە نیشانەیەکە کە زانیاریی ورد یان جووڵەی مەیدانی لە ئارادایە کە ئاراستەی رووداوەکان دەگۆڕێت.
پرسی سەربەخۆیی لە رۆژهەڵاتی کوردستان رەگێکی مێژوویی هەیە و بۆ دامەزراندنی کۆماری کوردستان لە مەهاباد (1946) دەگەڕێتەوە. لە کاتێکدا تاران لە چوار دەیەی رابردوودا بە تووندی دژی هەر داواکارییەکی فیدراڵی یان سەربەخۆیی وەستاوەتەوە، بەڵام جەنگی 2026 و تێکچوونی سیستەمی سیاسی، جارێکی دیکە ئەم پرسەی گەیاندووەتەوە ناو جەرگەی رووداوەکان.
ئەم جووڵە نوێیەی بازاڕە جیهانییەکان، وەک نیشانەیەک بۆ ئەگەری گۆڕانی نەخشەی سیاسیی ناوچەکە و گۆڕانی تێڕوانینی نێودەوڵەتی بۆ سنوورەکانی رۆژهەڵاتی ناوەڕاست لێکدەدرێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ