بەرنامەی بەرپرسیار.
رووداو دیجیتاڵ
شیلان ئیسماعیل تەمەنی 38 ساڵە و دایکی شەش منداڵە، بەمەبەستی لەدایکبوونی حەوتەمین منداڵی، رەوانەی نەخۆشخانەی ژنان و منداڵانی زاخۆ کراوە، کەسوکارەکەی دەڵێن، بەهۆی پێدانی "خوێنی هەڵە"وە سێ رۆژە بێهۆش بووە. تەندروستیی زاخۆ لیژنەیەکی لێکۆڵینەوەی پێکهێناوە و دەڵێن "هەر کەسێک کەمتەرخەم بووبێت سزا دەدرێت".
کاژێر 9ـی شەوی رۆژی پێنجشەممە، 01-05-2025، شیلان گەیێندراوەتە نەخۆشخانەی ئافرەتان و منداڵانی زاخۆ. یاسین عەبدولڕەحمان، ئامۆزی شیلان و برای هاوژینی، لە بەرنامەی بەرپرسیاری تۆڕی میدیایی رووداو، گوتی: " لە نەخۆشخانە گوتیان نەشتەرگەریی دەکەین و دوو بووتڵ خوێنمان پێویستە، ئەو کەسەی خوێنی بۆ پزیشک بردووە، گوتی؛ دوو جۆر خوێنمان بۆی بردووە."
جۆری خوێنی شیلان ئیسماعیل B+ـە؛ ئامۆزاکەی شیلان گوتی: "دوای نەشتەرگەرییەکە شیرینیمان بە کارمەندان دا و دڵمان خۆشبوو، گوتیان بڕۆنە دەرەوە. دواتر گوتیان تەندروستیی شیلان تێکچووە و ئەگەر هەیە نەشتەرگەرییەکەی هەڵەیەکی تێیدا هەبێت. دکتۆر گوتی، خوێنی A+مان پێداوە و هەڵەیەک روویداوە. چووینە لای شیلان، بینیمان دۆخی تێكچووە و دوای کەمێک بێهۆشبوو و جووڵەی نەما تاوەکو ئێستا."
کەسوکاری شیلان سکاڵایان تۆمارنەکردووە و سکاڵاش "تۆمار ناکەن". کێشەکەیان گەیاندووەتە لای بەڕێوەبەری گشتیی تەندروستیی زاخۆ. لەمبارەوە یاسین عەبدولڕەحمان، گوتی: "بەڵێنی پێداین هەموو کارێک دەکەین و باشترین دکتۆر و خزمەت پێشکێشی شیلان دەکەین، ئەوەی لە توانامان بێت بۆی دەکەین."
تەندروستی زاخۆ رەتیکردەوە هیچ روونکردنەوەیەک لەسەر ئەم بابەتە بدات. بەڵام ئەمیر عەلی، گوتەبێژی تەندروستی زاخۆ، بە رووداوی راگەیاند: "لیژنەیەکی لێکۆڵینەوە بۆ رووداوەکە پێکهاتووە و ئەنجامەکەی لە کۆنفرانسێکی رۆژنامەڤانیدا بۆ رای گشتی ئاشکرا دەکەین."
لە زانستی پزیشکیدا، وەرگرتنی خوێنی نەگونجاو یان بەدەر لە جۆری مرۆڤەکە خۆی، دەبێتە هۆی شکستهێنانی خرۆکە سوورەکانی خوێن و کاریگەریی بە رێژەی جیاجیا لە گورچیلە و فشاری خوێن دەکات، تاوەکو دەگاتە سەرئێشە، بێتاقەتی و بێهۆشی.
دکتۆر شۆخان محەممەد، پسپۆڕی نەخۆشییەکانی خوێن، لە بەرنامەی بەرپرسیار، سەبارەت بە پێدانی جۆری خوێنی هەڵە بە نەخۆش، گوتی: "گواستنەوەی خوێن پرۆسەیەکی قورس و ئاڵۆزە، هەر کەسێک خوێن وەردەگرێت، ئەوەی لە بەفرگر دەریدەهێنێت، ئەوەی دەیگوازێتەوە و ئەوەی بە نەخۆش دەدات، دەبێت هەموویان دووجار دڵنیاببنەوە لە جۆری خوێنەکە. هەر نەخۆشێک خوێنی هەڵەی پێبدرێت، راستەوخۆ یان تاوەکو 24 کاژێر نیشانەکانی لێ دەردەکەوێت."
سەرچاوەیەک لە نەخۆشخانەی ئافرەتان و منداڵبوونی زاخۆ، بە رووداوی گوت: "شیلان ئیسماعیل شەوی هەیینی کاژێر لە نێوان 8:30 بۆ 9:00ـی شەو هێنراوەتە نەخۆشخانەکەمان و پێویستی بە ئەنجامدانی نەشتەرگەری بوو. دوای ئەنجامدانی نەشتەرگەرییەکە بە سەرکەوتوویی، دوای دوو کاژێر تەندروستیی شیلان تێکچووە و رەوانەی بەشی چاودێریی چڕ کراوە لە نەخۆشخانەی گشتیی زاخۆ."
لەبارەی هۆکاری بێهۆشکەوتنی شیلانەوە، ئەو سەرچاوەیە گوتی: "لێکۆڵینەوەی سەرەتایی کراوە و دەرکەوتووە نەخۆشێک بە هەمان ناو لە نەخۆشخانە خەوێندراوە و خوێنەکەیان تێکەڵ بووە، هەندێکی دیکەش دەڵێن، بەهۆی جەڵتەوە بێهۆش کەوتووە. نەخۆشخانە لیژنەیەکی پێکهێناوە و 5 پزیشک لێکۆڵینەوە لە رووداوەکە دەکەن و تاوەکو ئێستا لێکۆڵینەوە لە رووداوەکە بەردەوامە. هەر لایەنێک کەمتەرخەم بووبێ، سزا دەدرێت."
شیلان ئیسماعیل کوڕێکی بووە و تەندروستی منداڵەکەی جێگیرە و بووەتە دایکی حەوت منداڵ. کەسوکاری شیلان چاوەڕێی ئەنجامی لێکۆڵینەوەکان دەکەن و دەڵێن: "سکاڵا تۆمار ناکەین، چاومان لەوەیە پزیشکی باش دابینبکرێت و لە خودا داواکارین هۆشی بگەڕێتەوە و بە تەندروستییەکی باش بگەڕێتەوە ماڵ."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ