پاشماوەی پەلەرەوەر نزیک پردی هیزۆپ
رووداو دیجیتاڵ
بەڕێوەبەری ناحیەی چوارقوڕنە رایدەگەیێنێت، لە رێگەی کامێراکانی چاودێرییەوە ئەو شۆفێرەیان دۆزیوەتەوە کە بڕێکی زۆر پاشەڕۆی پەلەوەری لە نزیک پردی هیزۆپ فڕێدابوو و ئێستا رێکاری یاسایی بەرامبەر گیراوەتە بەر.
بەشدار عەزیز، هاونیشتمانیی لەو سنوورە، بە رادیۆی رووداوی راگەیاند: "ماوەی 4 بۆ 5 رۆژە بڕێکی زۆر پاشەڕۆی پەلەوەرخانە لە نزیک پردی هیزۆپ فڕێدراوە. ناوچەکە شوێنێکی گەشتیارییە، بەڵام بەهۆی ئەو بۆنە ناخۆش و پیسەوە کە بڵاو بووەتەوە، ئێستا کەس ناتوانێت سەردانی بکات."
بە گوتەی دانیشتووانی ناوچەکە، هەرچەندە هەوڵێک بۆ پاککردنەوەی شوێنەکە دراوە، بەڵام وەک پێویست نییە و هێشتا پاشماوەکە کاریگەریی نەرێنی لەسەر ژینگە و سەرچاوەکانی ئاوی ناوچەکە هەیە.
سەبارەت بەم بابەتە، د. زانا رەسول، بەڕێوەبەری ناحیەی چوارقوڕنە بە رادیۆی رووداوی راگەیاند: "دوای ئەوەی لە لایەن هاونیشتمانیانەوە ئاگادار کراینەوە، هێزە ئەمنییەکانمان راسپارد بۆ دۆزینەوەی ئەو گەڵابەیەی پاشماوەکەی فڕێدابوو. لە رێگەی کامێراکانی چاودێری و سەرچاوەکانەوە توانرا شۆفێرەکە بدۆزرێتەوە."
بەڕێوەبەری ناحیەی چوارقوڕنە ئاماژەی بەوەش کرد، تۆمەتبارەکە دانیشتووی سنووری ئەوان نییە و پاشماوەکەی لە دەرەوەی ناحیەکە هێناوە، بەڵام "ئێستا بە فەرمانی دادوەر دۆسیەی بۆ کراوەتەوە و رێکاری یاسایی بەرامبەر گیراوەتە بەر."
هیزۆپ یەکێکە لە ناوچە گەشتیارییەکانی سنووری ئیدارەی راپەڕین و ساڵانە لەم وەرزەدا گەشتیارێکی زۆر رووی تێدەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ