رووداو دیجیتاڵ
کەشناسی و بوومەلەرزەزانیی عێراق رایگەیاند، مانگی رابردوو 38 بوومەلەرزەیان تۆمار کردووە، کە 15یان لە باشووری کوردستان بوون.
عامر جابری، بەڕێوەبەری راگەیاندن و پەیوەندییەکانی دەستەی کەشناسی و بوومەلەرزەزانیی عێراق ئەمڕۆ دووشەممە 4ی ئابی 2025، بە تۆڕی میدیایی رووداوی راگەیاند، لەو 15 بوومەلەرزانە، 6یان لە دەربەندیخان، کەلار، رانیە و دووکان، 4یان لە زاخۆ و ئامێدی، 4یان لە سنووری پارێزگای هەولێر و یەکێکیشیان لە خانەقین بوون.
هەروەها بوومەلەرزەیەک لە موسڵ و یەکێکی دیکە لە سامەڕا لە سنووری پارێزگای سەلاحەدین تۆمار کراون.
بە گوتەی عامر جابری، جگە لەمانە، هەر لە مانگی رابردوودا 12 بوومەلەرزە لەنزیک سنووری عێراق و هەرێمی کوردستان لەنێو خاکی ئێران و رۆژهەڵاتی کوردستان، 8 بوومەلەرزەش لەنێو خاکی تورکیا و باکووری کوردستان، یەک بوومەلەرزە لە حەسەکە-ی رۆژئاوای کوردستان تۆمار کراون.
لەبارەی گوڕی بوومەلەرزەکانیش، بەڕێوەبەری راگەیاندن و پەیوەندییەکانی دەستەی کەشناسی و بوومەلەرزەزانیی عێراق دەڵێت، گوڕەکانیان لەنێوان 1.1 تاوەکو 3.7 بووە و زیانی گیانییان نەبووە؛ قووڵاییەکەیان 5 - 33 کیلۆمەتر بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ