شوێنی فڕێدانی زبڵی جوانڕۆ
رووداو دیجیتاڵ
شوێنی فڕێدانی زبڵ و خاشاکی شاری جوانڕۆ لە پارێزگای کرماشان، تەنیا 200 مەتر لە شارەکەوە دوورە. رۆژانە نزیکەی 120 تۆن زبڵ لەو شوێنەی نزیک شار بەشێوەیەکی تەواو سەرەتایی فڕێدەدرێت.
یاسر نووری، ژینگەپارێز و دانیشتووی شاری جوانرۆ دەڵێت، "ئێرە زبڵدانی شاری جوانڕۆیە و یەکێک لە کێشە گەورەکانی ئەم شارەیە. هەروەکو دەبینین ئەم زبڵدانە لەنێو دارستانەکانە و بووەتە هۆی زیانگەیاندن بە ژینگە. هەر کاتێک ئاگر لە زبڵەکە بەردەدەن بۆ کەمکردنەوەی قەبارەی زبڵەکە، دووکەڵەکەی دێتە نێو شار و ژیانی هاووڵاتیان تێکدەدات."
نزیکەی 40 ساڵە، شاری جوانڕۆ کێشەی شوێنی فڕێدانی زبڵی هەیە. چەندین جار بەرپرسانی شارەکە بەڵێنی چارەسەرکردنی کێشەکەیان داوە، بەڵام تاوەکو ئێستا بەڵێنەکان نەبراونەتە سەر و کێشەکە وەکو خۆی ماوەتەوە.
ئەو شوێنەی ئێستا زبڵی لێ فڕێدەدرێت، ناستانداردە و سەرچاوەکانی ئاو و خاکی ناوچەکەی پیس کردووە و ژیانی خەڵک و هەروەها ئاژەڵە کێوییەکانی خستووەتە مەترسییەوە.
شوێنی ئێستای فڕێدانی زبڵی شاری جوانڕۆ لەنێو دارستانە و چەندین جار بووەتە هۆی ئاگرکەوتنەوە لە دارستانەکانی دەورووبەری. هەروەها شوێنەکە نزیکە لە شار و بۆنی پیسی زبڵەکە بە تایبەت لە وەرزی گەرمادا دانیشتووانی شارەکە هەراسان دەکات
یاسر نووری باسی لەوە کرد، "كێشەیەکی دیکەی ئەم زبڵدانە ئەوەیە کە نزیکە لە شاری جوانڕۆ و تەنیا 200 بۆ 300 مەتر لە مەسکەن مێهری هەلانی و گەڕەکی سەلیمزادە دوورە، کە نزیکەی سێ بۆ چوار هەزار کەس لێی دەژین، لە ساڵێکدا نزیکەی شەش مانگ بەهۆی بۆگەنی ئەو زبڵ و پاشماوەیە ژیانیان بە تەواوی تێکچووە. ئەمە دەکرێت هۆی بڵاوبوونەوەی نەخۆشی بێت بۆ بەساڵاچووان، منداڵان و سەرجەم هاووڵاتیان."
ژینگەپارێزان و خەڵکی ناوچەکە رەخنە لەوە دەگرن، تەنانەت پەرژینێک بە دەوری ئەو شوێنەدا نەکێشراوە کە زبڵەکەی تێدا فڕێ دەدرێت، بۆ ئەوەی ئاژەڵە کێوییەکان و سەگی بێ لانە نەتوانن بچنە نێو زبڵدانەکە و نەبنە هۆی گواستنەوەی نەخۆشی بۆ خەڵک. داوا لە بەرپرسانیش دەکەن، چارەسەرێک بۆ کێشەکە بدۆزنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ