رووداو دیجیتاڵ
پارێزگاری هەولێر دەڵێت، رێڕەوەکانی ئاوەڕۆیان پاککردووەتەوە و دوو ملیار دیناریش تەرخانکراوە بۆ کارەکان بە مەبەستی رێگری لە لافاو لە وەرزی باراندا.
ئومێد خۆشناو، پارێزگاری هەولێر ئەمڕۆ یەکشەممە، 05-10-2025، بە تۆڕی میدیایی رووداوی گوت: "بۆ وەرزی زستان و بارانبارینی ئەم ساڵ و رێگری لە هەر رووداوێکى نەخوازراو، ئەو خاڵە لاوازانەی دەبنە هۆی دروستبوونی لافاو و پەنگخواردنەوەى ئاوی زیادە، دەستکرا بە پاككردنەوەی کەند و رێڕەوەکانی ئاوەڕۆ".
هەڵمەتەکەی پارێزگای هەولێر بەردەوام دەبێت. ئومێد خۆشناو دەڵێت: "دوو ساڵە کار دەکەین لافاو روونەدات، 700 کیلۆمەتر رێڕەوە سرووشتییەکانی ئاومان خاوێنکردووەتەوە و ئێستاش کارەکان بەردەوامن".
پارێزگاری هەولێر ئاماژەی بەوەشکرد، ژمارەیەک پڕۆژەی ئاوەڕۆی سندووقی و لوولەیی لە هەولێر دروستکراوە و دروستکردنیش بەردەوام دەبێت ئەویش وەکو هەنگاوێکی دیکە بۆ رێگری لە لافاو.
جگە لە وەرزی بارینی رابردوو، ساڵانی پێشووتر چەند جارێک لافاو لە شاری هەولێر دروستبوو و زیانی گیانی و مادی لێکەوتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ