رووداو دیجیتاڵ
بەڕێوەبەری کشتوکاڵی ورمێ دەڵێت، وەرزی لێکردنەوەی تەماتە لە کێلگە کشتوکاڵییەکانی پارێزگاکە دەستیپێکردووە و پێشبینی دەکەن ئەم ساڵ بەرهەمی تەماتە لەو پارێزگایە بگاتە 400 هەزار تۆن.
خەسرەو شەهبازی، بەڕێوەبەری کشتوکاڵی پارێزگای ورمێ رایگەیاند، ئەم ساڵ پێنج هەزار و 300 هێکتار لە زەوییە کشتوکاڵییەکانی ئەو پارێزگایە بە تەماتە چێنراوە.
شەهبازی گوتی، لە سنووری پارێزگای ورمێ 30 کارگەی تایبەت بە بەرهەمهێنانی دۆشاوی تەماتە هەیە و بەشی زۆری لەلایەن کارگەکانەوە دەکڕدرێت. گوتیشی، لەنێوان 45٪ بۆ 50٪ـی بەرهەمەکە لە نێوخۆی پارێزگای ورمێ بەکاردەهێنرێت و بەشێکی رەوانەی پارێزگاکانی دیکەش دەکرێت.
بەڕێوەبەری کشتوکاڵی پارێزگای ورمێ گوتی، زۆرترین تەماتە لە سنووری شارەکانی ورمێ، میاندواو و شاهیندژ بەرهەم دێت.
بە گوتەی بەڕێوەبەری کشتوکاڵی پارێزگای ورمێ، لە هەر هێکتارێکدا 70 تۆن تەماتە بەرهەم دەهێنرێت و تێکڕای بەکارهێنانی تەماتە بۆ هەر کەسێک لە ساڵێکدا لەو پارێزگایە 50 کیلۆگرامە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ