رووداو دیجیتاڵ
بەڕێوەبەری گشتیی سەرچاوە سرووشتییەکانی پارێزگای ئیلام دەڵێت، لە نەورۆزی ئەم ساڵەوە 39 جار ئاگر لە پووش و پاوان و دارستانەکانی پارێزگاکە کەوتووەتەوە، بەو هۆیەوە زیاتر لە 1400 هێکتار لەو رووبەرە سووتاوە.
ئەمڕۆ شەممە 06-09-2025 یاسەمین خان محەممەدیان، بەڕێوەبەری گشتیی سەرچاوە سرووشتییەکانی پارێزگای ئیلامی رۆژهەڵاتی کوردستان ئامارێکی تایبەت بە ئاگرکەوتنەوەی لە سنووری پارێزگاکە خستەڕوو.
بەگوتەی یاسەمین خان محەممەدیان، لە 21-03-2025ەوە 39 جار ئاگر لە دارستان و پووش و پاوانی پارێزگاکە کەوتووەتەوە کە بەشێکیان بە دەست ئەنقەست بوون.
بەڕێوەبەری گشتیی سەرچاوە سرووشتییەکانی ئیلام ئاماژەی بەوە کرد، لەو ماوەیەدا زیاتر لە هەزار و 400 هێکتار دارستان و پووش و پاوان سووتاوە کە زیاتر لە ناوچە شاخاوییەکان بووە.
یاسەمین خان محەممەدیان ئاماژەی بە سزادانی ئەو کەسانە کرد کە دەبنەهۆی ئاگرکەوتنەوە لە دارستانەکان و گوتی: ''هەر کەسێک بەئەنقەست ئاگر لە دارستان و پووش و پاوان بەربدات، بەپێی یاسا بە پێبژاردن و بەندکردن لە 3 مانگەوە بۆ 10 ساڵ سزا دەدرێ.''
رووبەری پارێزگای ئیلامی رۆژهەڵاتی کوردستان زیاتر لە دوو ملیۆن هێکتارە.
هۆکارە مرۆییەکان هۆکاری بەشی زۆری سووتانی دارستانەکانن، بەڵام هۆکارە سرووشتییەکانیش رۆڵیان هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ