هەڵەیەک روویدا! دووبارە هەوڵبدە
رووداو دیجیتاڵ
ئەنجوومەنی باڵای بەڕێوەبردنی دەم پارتی راگەیێندراوێکی لەبارەی شەڕ و تۆپبارانی هەردوو گەڕەکی شێخ مەقسوود و ئەشرەفییە بڵاوکردەوە.
دەم پارتی ئەمڕۆ چوارشەممە 7-1-2026 لە راگەیێندراوێکدا ئاماژەی بەوە کردووە، بەگوێرەی زانیارییەکانی هێزەکانی ئاسایشی ناوخۆی حەلەبی سەر بە بەڕێوەبەرایەتیی خۆسەر، لە ئەنجامی ئەو هێرشانەی هێزەکانی حکومەتی دیمەشق لە شەوی رابردووەوە بە تانک، تۆپ و درۆن دەیانکاتە سەر گەڕەکە کوردنشینەکانی شێخ مەقسوود و ئەشرەفییە و هەروەها گەڕەکی بەنی زەید (کە زۆرینەی دانیشتووانی سریانیین)، تاوەکو ئێستا 7 کەسی سڤیل گیانیان لەدەستداوە و لانیکەم 46 کەسی دیکەش بریندار بوون.
لە راگەیێندراوەکەدا هاتووە، لەو هێرشانەدا گرووپەکانی (حەمزات، عەمشات، سوڵتان موراد و نوورەدین زەنگی) بەشدارن.
دەم پارتی دەڵێ، حکومەتی دیمەشق و هێزەکانی سەر بەو حکومەتە کە چەندین مانگە رێگری لە گەیاندنی پێداویستییە سەرەتاییەکان بۆ دانیشتووانی ئەو گەڕەکانە دەکەن، بەم هێرشانەیان هەڕەشەیەکی راستەوخۆ لە یەکپارچەیی سیاسی، کارگێڕیی و سەقامگیریی سووریا دەکەن.
هاوكات ئاماژە بەوە کراوە کە بەگوێرەی رێککەوتنی 10ـی ئادار، هێزەکانی سووریای دیموکرات (هەسەدە) لە نیسانی 2025دا بە چەکی قورس لە گەڕەکە کوردنشینەکان کشانەوە و پاراستنی ناوچەکەیان رادەستی ئاسایشی ناوخۆ کرد.
دەم پارتی دەڵێ، ئەم هێرشانەی هێزەکانی حکومەتی دیمەشق، رێککەوتنی 10ـی ئادار و رێککەوتنەکەی 1ـی نیسان پێشێل دەکەن و دەڵێت: "هێرشەکان ژیانی زیاتر لە 200,000 کەسی سڤیل دەخەنە مەترسییەوە. هێرشەکانی سەر گەڕەکە کوردنشینەکانی حەلەب، ئۆپەراسیۆنێکی لەناوبردنن و ئەوەی دەیانەوێ لەو گەڕەکانە ئەنجامی بدەن، کۆمەڵکوژییەکی گەورەترە لەوەی ویستیان لە سوەیدا دژ بە دروزەکان ئەنجامی بدەن."
لە بەشێکی دیکەی راگەیێندراوەکەدا هاتووە، سووریا نیشتمانی عەرەب، کورد، دروز، ئەرمەن و هەموو ئەو گەل و پێکهاتە ئایینییانەیە کە تێیدا دەژین. دەم پارتی دەڵێت: "گرنگترین رێگە بۆ رێگریکردن لە دروستبوونی دۆخێکی نوێی شەڕ و پێکدادان لە سووریا، بە دیموکراسییکردنی وڵاتەکەیە. ئەرکی سەرشانی تورکیاش ئەوەیە کە پشتگیریی لە پرۆسەی بە دیموکراسییبوون بکات."
دەم پارتی ئەو هەوڵانە بە "قبووڵنەکراو" دەزانێت کە دەیانەوێ سووریا رادەستی دەسەڵات و عەقڵییەتێکی تاکڕۆ لە دیمەشق بکاتەوە، چونکە بە بڕوای ئەوان، ئەمە دەبێتە هۆی پارچەپارچەبوون و هەڵگیرسانی شەڕێکی نوێ.
لە کۆتاییدا دەم پارتی داوا لەو هێزانە دەکات کە لەنێوان بەڕێوەبەریی خۆسەری باکوور و رۆژهەڵاتی سووریا و حکومەتی دیمەشقدا رۆڵی نێوەندگیر دەگێڕن، دەستبەجێ بەرپرسیارێتیی خۆیان وەک لایەنی گرەنتیکار جێبەجێ بکەن و رێگری لەو هێرشە سەربازییانە بکەن کە مەترسییان بۆ سەر تەواوی سووریا هەیە.
ئێستا شەڕ و پێکدادانی سەخت لەنێوان گرووپە چەکدارەکانی سەر بە حکومەتی سووریا و ئاسایشی ناوخۆی گەڕەکەکانی ئەشرەفییە و شێخ مەقسوود لە شاری حەلەب بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ