رووداو دیجیتاڵ
پارێزگاری دێرسم رایدەگەیێنێت، لە ساڵی 2025ـدا رێژەی تاوان لە پارێزگاکە بەراورد بە ساڵی پێشتر 13٪ کەمیکردووە و بووەتە یەکێک لەو پارێزگایانەی کەمترین تاوانی تێدا دەکرێت.
رۆژی چوارشەممە، 7-1-2026، شەفیق ئایگۆل، پارێزگاری دێرسم بە ئامادەبوونی فەرماندەی جەندرمە و بەڕێوەبەری ئاسایشی پارێزگاکە، لە کۆنفرانسێکی رۆژنامەڤانی دا کە تۆڕی میدیایی رووداو تێیدا ئامادەبوو، ئاماری رووداوەکانی ساڵی رابردووی خستەڕوو.
پارێزگاری دێرسم رایگەیاند: "پارێزگاکەمان لە رووی ئاسایشەوە لەسەر ئاستی وڵات سەرکەوتنی بەدەستهێناوە."
بە گوێرەی ئامارەکان، لە ساڵی 2025ـدا لە سنووری پارێزگای دێرسم 2 هەزار و 720 رووداوی ئەمنی روویانداوە، لەکاتێکدا ساڵی 2024 ژمارەکە 3 هەزار و 128 رووداو بووە؛ واتە رووداوەکان 13٪ کەمیان کردووە. پارێزگار دەڵێت: "رێژەی ئاشکراکردنی تاوان و رووداوەکان 99.8٪ بووە."
سەبارەت بە دەستگیرکردنی تۆمەتباران لە ساڵی 2025ـدا، شەفیق ئایگۆل گوتی: "3 هەزار و 101 گومانلێکراو دەستگیرکراون؛ لەو ژمارەیە 41 کەسیان رەوانەی گرتووخانە کراون و 229 کەسیشیان بە فەرمانی دادوەر راگیراون."
لەبارەی بەرەنگاربوونەوەی مادە هۆشبەرەکان، پارێزگاری دێرسم ئاشکرای کرد، لە 133 ئۆپەراسیۆندا 210 گومانلێکراو دەستگیر کراون و 12ـیان خراونەتە زیندانەوە، 6 کەسیشیان بە مەرجی چاودێریی دادوەری ئازادکراون. گوتیشی: "تەنانەت بەرگەی ناوی مادەی هۆشبەریشمان نییە و چالاکییەکانمان تاوەکو دەستگیرکردنی دوایین فرۆشیار بەردەوام دەبێت."
هەر لە کۆنفرانسەکەدا ئاماژە بەوە کرا، 23 ئۆپەراسیۆن دژی تاوانی رێکخراو و 37 ئۆپەراسیۆن دژی "رێکخراوەکان" کراون؛ لە ئەنجامی ئەو ئۆپەراسیۆنانەشدا دەیان کەس دەستگیرکراون و رێکاری یاساییان بەرامبەر گیراوەتەبەر.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ