رووداو دیجیتاڵ
بەڕێوەبەرایەتیی چاودێریی بازرگانیی سلێمانی ئاماری کار و چالاکییەکانی ساڵێکی بڵاوکردەوە؛ لەو ماوەیەدا بەهۆی سەرپێچییەوە زیاتر لە 1400 شوێن سزادراون و بڕی پێبژاردنیش 100 ملیۆن دیناری تێپەڕاندووە.
دیار جەمال مەجید، لێپرسراوی هۆبەی چاودێری و پشکنین لە بەڕێوەبەرایەتیی چاودێریی بازرگانیی سلێمانی بە رادیۆی رووداوی راگەیاند، بازاڕەکانی سلێمانی لەژێر چاودێرییەکی چڕدان و سیاسەتی "نرخ هەڵواسین" بە سەرکەوتوویی جێبەجێ کراوە، ئەمەش وایکردووە کێبڕکێیەکی دروست لەنێوان فرۆشیاران دروستبێت و هاووڵاتییان بە ئاسانی نرخەکان بزانن.
بەگوێرەی ئامارەکانی چاودێریی بازرگانیی سلێمانی، لە ماوەی ساڵێکدا تەنیا لە سەنتەری شاری سلێمانی کار و چالاکییەکانیان بەم شێوەیە بووە:
سەردانی مەیدانی: 4864 سەردان لە لایەن 5 تیمی جیاوازەوە کراون.
سەرپێچی: 1478 پسوڵەی سەرپێچی بۆ شوێنە جیاوازەکان کراون.
لەناوبردنی کاڵا: دەست بەسەر 17 تۆن و 387 کیلۆگرام کاڵای خراپ و ماوەبەسەرچوودا گیراوە و لەنێوبراون.
سزای دارایی: کۆی بڕی پێبژاردن (غەرامە) گەیشتووەتە 101 ملیۆن و 500 هەزار دینار.
سەبارەت بە ساختەکردنی هێما بازرگانییەکان (براندەکان)، دیار جەمال ئاماژەی بەوە کرد، هەوڵێکی زۆریان داوە بۆ رێگری لە کاڵای ساختە و گوتی: "دیاردەی ساختەکردنی براندە جیهانی و ناوخۆییەکان بە رێژەیەکی بەرچاو کەمیکردووە و ئێستا تەنیا نزیکەی 10%ـی ئەو دیاردەیە لە بازاڕەکاندا ماوە."
لێپرسراوی هۆبەی چاودێری و پشکنین هۆشداریش دەداتە ئەو شوێنانەی جیاوازی لە نرخی سەر رەفە و لای کاشێر دەکەن و دەڵێت: "بە تووندی رووبەڕووی ئەو دیاردەیە دەبینەوە و سزاکەی دەگاتە داخستنی شوێنەکە، بەهۆی تووندیی سزاکانیشەوە ئێستا ئەو حاڵەتە زۆر کەمیکردووە."
چاودێریی بازرگانیی سلێمانی جەخت دەکاتەوە، هەر شوێنێک بیەوێت لە وەرز و بۆنەکاندا داشکاندن رابگەیەنێت، دەبێت مۆڵەتی فەرمی وەربگرێت و لە رێگەی کاشێرەوە وردبینی بۆ داشکاندنەکان دەکرێت تاوەکو فێڵ لە کڕیار نەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ