هەڵەیەک روویدا! دووبارە هەوڵبدە
یەکێتییەکە دەڵێت، لە 6 مانگی یەکەمی ئەم ساڵ 34 پیاو خۆیان کوشتووە و 9ـی دیکەش بەهۆی کێشەی خێزانییەوە کوژراون.
رووداو دیجیتاڵ
سەرۆکی یەکێتیی پیاوانی کوردستان رایگەیاند، خێزان لە هەرێمی کوردستان "بە دۆخێکی خراپدا تێدەپەڕێت" بە تایبەتی لە رووی هەڵوەشانەوەی شیرازەی خێزان، بە جۆرێک لە 14 ساڵدا 115 هەزار هاوژین جیابوونەتەوە.
بورهان عەلی، سەرۆکی یەکێتیی پیاوانی کوردستان، لە بووڵتەنی کاژێر 12:00ـی تۆڕی میدیایی رووداو کە سەنگەر عەبدولڕەحمان پێشکێشی دەکات راگەیاند، قەیرانی دارایی، بێمووچەیی و بێکاری، کاریگەریی راستەوخۆی لەسەر زیادبوونی کێشە خێزانییەکان هەبووە، چونکە "کاتێک کاسەی ماڵ بەتاڵە، هۆکارە بۆ سەرهەڵدانی کێشەکان."
"تەڵاق بووەتە دیاردەیەکی چاولێکەری"
سەرۆکی یەکێتیی پیاوان هۆکارەکانی تێکچوونی شیرازەی خێزان بۆ چوار خاڵی سەرەکی دەگەڕێنێتەوە و دەڵێت, "یەکەم، قەیرانی دارایی و ئابووری. دووەم، چاولێکەری، کە بەداخەوە تەڵاق و جیابوونەوە لە حاڵەتەوە بووەتە دیاردە. سێیەم، نەمانی رووحی قوربانیدان لەنێوان ژن و پیاودا. هۆکاری چوارەمیش تاکگەرییە، پێشتر خێڵ و دواتر خێزان چەقی کۆمەڵگە بوو، بەڵام ئێستا تاک بووەتە چەقی کۆمەڵگە و تەنیا بیر لە بەرژەوەندیی خۆی دەکاتەوە."
بەپێی ئەو ئامارەی کە یەکێتییەکە لە 6 مانگی یەکەمی ئەم ساڵدا کۆیکردووەتەوە و بە رووداوی داوە، 356 سکاڵای تووندوتیژی لە سەرجەم قەزا و ناحیەکانی هەرێمی کوردستان تۆمارکراون.
سەرۆکی یەکێتیی پیاوان روونیکردەوە، "بەداخەوە لەو ماوەیەدا 34 پیاو خۆیان کوشتووە و 9 پیاوی دیکەش بەهۆی کێشەی خێزانییەوە کوژراون. ئەم ئامارانە بە بەراورد بە ساڵی رابردوو زۆر زیادیان کردووە."
بورهان عەلی ئاشکرای کرد، لە دادگاکانی هەرێمی کوردستان، داواکارییەکانی جیابوونەوە بە رێژەیەکی بەرچاو لەلایەن ژنانەوە پێشکەش دەکرێن. وەک خۆی دەڵێت، "لە سەرووی 60% و لەوانەیە بگاتە 70%ـی ئەو کەیسانەی داوای جیابوونەوە دەکەن، لەلایەن ژنانەوەیە."
سەبارەت بە تووندووتیژی دژی پیاوان، بورهان عەلی گوتی، "تووندوتیژیی جەستەیی دژی پیاوان کەمە، بەڵام تووندووتیژیی زارەکی زۆر زیادیکردووە. هەروەها دەرکردن و دوورخستنەوەی پیاو لە ماڵەکەی خۆی بە بڕیاری یاسایی بووەتە دیاردە، ئەمەش دوای ئەوەی بەهۆی کێشەیەکی بچووکەوە و لە رێگەی مۆبایلەوە سکاڵا لەسەر پیاوەکە تۆمار دەکرێت و راستەوخۆ بەڕێوەبەرایەتیی تووندوتیژیی خێزانی دێتە ناو بابەتەکەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ