رووداو دیجیتاڵ
لە سنووری قەزای خەلیفان لە ئیدارەی سەربەخۆی سۆران، دوو گەشتیار کەوتوونەتە نێو رووبار و یەکێکیان خنکاوە و ئەوی دیکەش رزگار کراوە.
رەوەند مەغدید، گوتەبێژی بەرگری شارستانی سۆران ئەمڕۆ یەکشەممە 07-09-2025 بە تۆڕی میدیایی رووداوی گوت: "رووداوەکە کەمێک لەمەوبەر بووە، ئەوانەی کەوتوونەتە ئاوەکەوە دوو کەس بوون و یەکێکیان خنکاوە".
ئەو گەشتیارەی خنکاوە، عەرەبە و گەنجێکی تەمەن 25 ساڵە.
تەرمی قوربانییەکە براوەتە نەخۆشخانەی فریاکەوتنی خەلیفان، بڕیارە دواتر ببرێتە دادپزیشکیی سۆران و پاشان رادەستی کەسوکارەکەی بکرێتەوە.
دوێنێش لە سنووری قەزای چۆمان لە ئیدارەی سۆران، منداڵێک لە ئاودا خنکا.
ئەمساڵ تاوەکو ئەمڕۆ لە سنووری ئیدارەی سەربەخۆی سۆران 9 کەس لە ئاودا خنکاون.
بەگوێرەی بەدواداچوونێکی رووداو، ئەم ساڵ تاوەکو 05ـی ئاب، لە هەرێمی کوردستان 49 کەس لە ئاودا خنکابوون، 23 لە پارێزگای هەولێر، 19 لە پارێزگای دهۆک، لە پارێزگای سلێمانی پێنج کەس و لە هەڵەبجەش دوو کەس خنکابوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ