رووداو دیجیتاڵ
لێپرسراوی بەشی كەشناسیی كشتوكاڵی سلێمانی رایگەیاند، لەماوەی 24 كاژێری رابردوودا لە سنووری پارێزگای سلێمانی زۆرترین باران لە ناحیەی خەلەكان باریوە كە 25 ملم بووە، كەمترینیش لە سنووری خانەقین بووە كە 2.1 ملم بارانی لێباریوە، بارانبارینی ئەمساڵی سلێمانیش لە 200 ملم نزیك دەبێتەوە.
كارزان لەتیف، لێپرسراوی بەشی كەشناسیی كشتوكاڵی سلێمانی بە تۆڕی میدیایی رووداوی گوت، ئامارەكانی بارانبارین تاوەكو ئێستا "دڵخۆشكەرن" و گوتی، جگە لە بازیان و رانیە، لە هەموو ناوچەكان بەراورد بە ساڵی پێشوو ئەمساڵ زیاتر باران باریوە.
كارزان لەتیف دەڵێت، "ئەمساڵ لە بازیان 316.2 ملم باران باریوە، بەڵام ساڵی پێشوو تاوەكو ئەم كاتە 355.4 ملم باران باریبوو، لە رانیەش ئەمساڵ 248.9 ملم باران باریوە، بەڵام ساڵی پێشوو تاوەكو ئەمكاتە 267 ملم باریبوو، جگە لەو دوو ناوچەیە لە سەرجەم ناوچەكانی دیكە ئەمساڵ بارانبارین باشتر بووە، تەنانەت ئەمساڵ لە شەش ناوچەی سلێمانی سەروو 300 ملم باران باریوە كە ساڵی پێشوو تەنیا لە بازیان سەرووی 300 ملم باران باریبوو."
لێپرسراوی بەشی كەشناسیی كشتوكاڵی سلێمانی ئەوەشی خستەڕوو، بارانبارینی سلێمانی گەیشتووەتە 196.6 ملم كە ساڵی پێشوو 122.3 ملم بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ