هەڵەیەک روویدا! دووبارە هەوڵبدە
رووداو دیجیتاڵ
ئەندامێکی کۆنگرەی پێنجەمی کۆمەڵی دادگەریی کوردستان دەڵێت، لە کۆنگرەی پێنجەمدا کۆمەڵێک بڕگە تەواو نەکران، بۆیە لیژنەیەک بۆ رێکخستن و پەسندکردنی ئەو بڕگانە پێکهێندراوە.
رۆژی 19ی تەممووز، کۆنگرەی کۆمەڵی دادگەریی کوردستان لە هۆڵی سەعد عەبدوڵڵا لە شاری هەولێر دەستی بە کارەکانی کرد و دوو رۆژی خایاند.
رۆژی دووشەممە 8ی ئەیلوولی 2025 عەبدولستار مەجید، ئەندامی کۆنگرەی پێنجەمی کۆمەڵی دادگەریی کوردستان بە تۆڕی میدیایی رووداوی راگەیاند، ''دەسەڵاتی رێکخستن، هەموارکردن و پەسندکردنی ئەو بڕگە و مادانەی پەیڕەوی ناوخۆی کۆمەڵ کە مابوون، لەلایەن کۆنگرەوە درایە ئەنجوومەنی سەرکردایەتی.''
بە گوتەی عەبدولستار مەجید، ئەنجوومەنی سەرکردایەتیی حیزبەکەی لیژنەیەکی پێکهێناوە تاوەکو بەدواداچوون بۆ ئەو چەند بڕگەیە بکات، رێکیان بخات و پەسندیان بکات.
کۆمەڵی دادگەریی کوردستان نزیکەی 23 مادەی پەیڕەوی ناوخۆی هەیە. ئەو ئەندامەی کۆنگرەی پێنجەمی کۆمەڵی دادگەریی کوردستان گوتیشی: ''لیژنەکە بەم نزیکانە دەست بە کار دەکات و هەفتەیەکی پێویستە بۆ رێکخستنی هەموو بڕگەکان.''
کۆمەڵی دادگەریی کوردستان سەرەتا بە ناوی کۆمەڵی ئیسلامیی کوردستان ساڵی 2001 دامەزرا و لە کۆنگرەی چوارەمدا ناوەکەی گۆڕدرا.
عەبدولستار مەجید گوتی، ''لە کۆنگرەی پێنجەمدا بڕیاردرا ناوی کۆمەڵی دادگەریی کوردستان بکرێتەوە کۆمەڵی ئیسلامیی کوردستان، بەڵام دوای تەواوکردنی رێکارەکان بۆ کۆمیسیۆن دەینێرین و چاوەڕێی رەزامەندیی ئەوان دەکەین.''
کۆنگرەی چوارەمی کۆمەڵی دادگەریی کوردستان لە شوباتی 2021 بەڕێوەچوو و تێیدا عەلی باپیر هەڵبژێردرایەوە و پۆستی کەسی یەکەمی حیزبەکە لە ''ئەمیر''ەوە بۆ ''سەرۆک'' گۆڕدرا.
ئەو حیزبە لە پەرلەمانی عێراق یەک کورسی هەیە و لە دوایین هەڵبژاردنی پەرلەمانی کوردستاندا سێ کورسی بەدەستهێنا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ