رووداو دیجیتاڵ
جێگری سەرۆکی حکومەتی هەرێمی کوردستان دەڵێت، ئاگرکەوتنەوە لە باڵەخانەیەکی سۆران کە بووە هۆی گیانلەدەستدانی 14 کەس و برینداربوونی حەوت کەسی دیکە خەمباری کردووە. دەشڵێت، "لایەنی کەمتەرخەم دەبێت بەرپرسیارێتی یاسایی هەڵبگرێت".
ئەم شەوی هەینی، 8-12-2023، ئاگر لە باڵەخانەیەک لە قەزای سۆران کەوتەوە، کە شوێنی نیشتەجێبوونی ژمارەیەک مامۆستا بووە، تائێستا بەهۆیەوە 14 کەس گیانیان لەدەستداوە و حەوت کەسیش بە برینداری لە نەخۆشخانەن.
قوباد تاڵەبانی، جێگری سەرۆکی حکومەتی هەرێمی کوردستان لە راگەیێندراوێکدا ئاماژەی بەوە کردووە، "لە دڵەوە هاوخەمی کەسوکاری قوربانیانی ئەم رووداوە دڵتەزێنەم و هیوای چاکبوونەوەش بۆ بریندارەکان دەخوازم. بەداخەوە لە ماوەی ساڵانی رابردوودا ئەمە چەندەمین جارە رووداوی هاوشێوە دووبارە دەبنەوە، لەگەڵ لایەنە پەیوەندیدارەکان لەسەر خەتین و چاوەڕێی ئەنجامی لێکۆڵینەوەکانین، لایەنی کەمتەرخەم دەبێت بەرپرسیارێتی یاسایی هەڵبگرێت".
بەگوێرەی دادپزیشکی سۆران بۆ رووداو، چوار لەو کەسانەی کە بریندار بوون، کارمەندانی بەرگریی شارستانین. pic.twitter.com/Vn4fNazGCA
— Rudaw (@Rudawkurdish) December 8, 2023
بەگوێرەی زانیارییەکان، چەند قوتابی و مامۆستایەکی زانکۆی سۆران لە نێو ئەو کەسانەدا بوون گیانیان لەدەستدا، لەوبارەوە د. رزگار سەعید، یاریدەری سەرۆکی زانکۆی سۆران بە تۆڕی میدیایی رووداوی گوت، "باڵەخانەکە شوێنێکی ئەهلییە و پەیوەندی بە زانکۆی سۆرانەوە نییە، دەکرێت مامۆستا یان خوێندکاری زانکۆ لەو باڵەخانەیەدا نیشتەجێبن، وەکو چۆن دەکرێت کرێکارێکیشی تێدا نیشتەجێ بێت."
نزیکەی کاژێرێک دوای رووداوەکە رائید رەوەند مەغدید، گوتەبێژی بەرگری شارستانی بە تۆڕی میدیایی رووداوی گوت، ئاگرەکەیان کۆنترۆڵ کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ