رووداو دیجیتاڵ
لە نزیک شاری خوڕەمئاوای پارێزگای لوڕستانی رۆژهەڵاتی کوردستان، دەست بەسەر 200 کیلۆگرام مادەی هۆشبەر لە جۆری تریاکدا گیرا. بەڕێوەبەری پۆلیسی پارێزگاکە دەڵێت: ''لە پارێزگاکانی باشووری ئێرانەوە هێنراوە.''
چوارشەممە، 08-05-2024، یەحیا ئیلاهی، بەڕێوەبەری پۆلیسی پارێزگای لوڕستانی رۆژهەڵاتی کوردستان رایگەیاند، لەلایەن تیمەکانی بەرەنگاربوونەوە و نەهێشتنی مادە هۆشبەرەکان لە رێگەی پێلی زاڵ-خورەمئاوای سەر بە پارێزگاکە، بارهەڵگرێک راگیراوە. دوای پشکنینی ورد دەرکەوت 200 کیلۆگرام مادەی هۆشبەری لە جۆری تریاک تێدا بووە و دەستی بەسەردا گیراوە.
بەگوتەی یەحیا ئیلاهی، مادە هۆشبەرەکە لە نێو بارێکی تەماتەدا شاردرابووەوە کە لە پارێزگاکانی باشووری ئێرانەوە هێنراوەتە لوڕستان و قاچاخچییەکان ویستوویانە لەوێوە بیگەیێننە تاران.
بەڕێوەبەری پۆلیسی پارێزگاکە ئاماژەی بەوە کرد، دەست بەسەر بارهەڵگرەکەدا گیراوە و پەیوەست بە دۆسیەکەش قاچاخچییەکی مادەی هۆشبەر دەستگیرکراوە.
بەگوێرەی راگەیێندراوێکی بەڕێوەبەرایەتیی پۆلیسی پارێزگای لوڕستان کە دوێنێ چوارشەممە بڵاوکرایەوە، لە 21-03-2024ـەوە دەستیان بەسەر دوو تۆن و 50 کیلۆگرام مادەی هۆشبەر لە پارێزگاکەدا گرتووە و 560 قاچاخچی و خوردە فرۆشیش دەستگیرکراون.
هەر بەگوێرەی راگەیێندراوەکە، لەو ماوەیەدا دەست بەسەر 48 بارهەڵگر و ئۆتۆمبێلی تایبەتیشدا گیراوە کە هەڵگری مادەی هۆشبەری جۆراوجۆر بوونە و زۆربەیان لە پارێزگاکانی باشووری ئێرانەوە هاتوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ