رووداو دیجیتاڵ
بەڕێوەبەری پۆلیسی پارێزگای سنەی رۆژهەڵاتی کوردستان دەڵێت، ''فێڵباز"ـێکیان دەستگیرکردووە 130 ملیار تمەن (زیاتر لە 2.2 ملیۆن دۆلار)ی خەڵکی بردووە.
عەلی ئازادی، بەڕێوەبەری پۆلیسی پارێزگای سنەی رۆژهەڵاتی کوردستان رایگەیاند: ''دوای تۆمارکردنی ژمارەیەکی زۆر سکاڵا لەسەر کەسێک لە شاری مەریوان کە گوایە فێڵی لە خەڵک کردووە و پارەی بردوون، بە هاوئاهەنگیی دەسەڵاتی دادی پارێزگاکە بەدواداچوونمان بۆ دۆسیەکە دەستپێکرد.''
بەڕێوەبەری پۆلیسی پارێزگای سنە گوتی، ئەو کەسە بە ناوی فرۆشتنی موڵک و زەویوزار، پارەی لە خەڵک وەرگرتووە، بەڵام فێڵی لێکردوون، تائێستاش 180 سکاڵای لەسەر تۆمار کراوە.
بەگوتەی عەلی ئازادی، دوو ساڵە فەرمانی دەستگیرکردن بۆ تۆمەتبار دەرچووە و دوێنێ شەممە 08-06-2024، لە ئۆپەراسیۆنێکی تایبەتدا دەستگیرکراوە: ''دانی بەوەدا ناوە کە 130 ملیار تمەن (زیاتر لە دوو ملیۆن و 200 هەزار دۆلار)ی خەڵکی خواردووە."
بەڕێوەبەری پۆلیسی سنە ئەوەشی خستەڕوو، تۆمەتبار بۆ لێکۆڵینەوەی زیاتر رادەستی دەسەڵاتی دادی پارێزگاکە کراوە و بەدواداچوونی زیاتر بۆ دۆسیەکەی دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ