رووداو دیجیتاڵ
بەڕێوەبەری حەج و عومرەی هەرێمی کوردستان رایگەیاند، گەڕانەوەی حاجییانی هەرێمی کوردستان بەردەوامە و ئەمڕۆ یەکشەممە 341 حاجیی دیکە لە رێگەی فڕۆکەخانەی نێودەوڵەتیی هەولێر دەگەڕێنەوە هەرێمی کوردستان.
نیاز نەقشبەندی، بەڕێوەبەری حەج و عومرەی هەرێمی کوردستان رایگەیاند، کاژێر 8:00ـی ئێوارەی رۆژی یەکشەممە، 9ـی تەممووز 341 حاجیی دیکە لە رێگەی فڕۆکەخانەی نێودەوڵەتیی هەولێر دەگەڕێنەوە هەرێمی کوردستان، ئەو حاجییانە دانیشتووانی پارێزگای هەولێر و دهۆکن.
بەگوتەی نیاز نەقشبەندی تاوەکو 14ـی ئەم مانگە گەڕانەوەی حاجییان بەردەوامە و دەشڵێت: "کاژێر 1:00ـی شەوی دووشەممە کاروانێکی دیکەی حاجییان لە رێگەی فڕۆکەخانەی نێودەوڵەتیی هەولێر دەگەڕێنەوە هەرێمی کوردستان کە ژمارەیان 144 حاجییە و هەموویان دانیشتووی پارێزگای هەولێرن."
ئەمساڵ 4,685 کەس لە هەرێمی کوردستانەوە بۆ بەجێگەیاندنی فەریزەی حەج چوونە مەککە کە 690ـیان بە رێگەی وشکانی و ئەوانی دیکە بە رێگەی ئاسمانی چوون. بۆ ئەمساڵ، تێچووی حەج بە رێگەی ئاسمانی بە 4,500 و بە وشکانیش بە 3,800 دۆلار دیاریکرابوو.
یەکەم گەشتی هاونیشتمانییان بۆ سعودیە بە مەبەستی بەجێگەیاندنی فەریزەی حەج 9ی حوزەیران بە رێگەی وشکانی دەستیپێکرد؛ گەشتی ئاسمانییش لە 12ی حوزەیران لە فڕۆکەخانەکانی هەولێر و سلێمانییەوە دەستیپێکرد.
رۆژی چوارشەممە، 05-07-2023 یەکەم کاروانی حاجییانی هەرێمی کوردستان کە ژمارەیان 690 حاجی بوو بە رێگەی وشکانی گەڕانەوە هەرێمی کوردستان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ